जेनजी प्रदर्शनमा ७२ वर्षीय वृद्ध : यो पुस्ताले चाहिँ साँच्चै परिवर्तन ल्याओस्

News Summary

Generated by OK AI. Editorially reviewed.

सामाजिक सञ्जाल बन्दविरुद्ध जेनजीले आह्वान गरेको आन्दोलनमा विभिन्न उमेर समूहका व्यक्ति सहभागी छन्।
७२ वर्षीय नारायणप्रसाद शर्मा युट्युब बन्द भएपछि छटपटिएका छन् र माइतीघरमा शान्त विरोध जनाइरहेका छन्।
शर्माले भनेका छन्- सरकारले साह्रै दु:ख दिए, नेताले सबै बेचे, अब त चिहान र घाट पनि बाँकी नराख्लान् जस्तो भो।

२३ भदौ, काठमाडौं । सामाजिक सञ्जाल बन्दविरुद्ध ‘जेनजी’ ले आह्वान गरेको आन्दोलनमा युवाहरु मात्र होइन । विभिन्न उमेर समूहका व्यक्ति सहभागी छन् । त्यस्तै मध्येका एक हुन्- सुर्खेत लाटीकोइलीका ७२ वर्षीय नारायणप्रसाद शर्मा ।

उनी आफूलाई मन लागेको कुरा युट्युबमा हेर्थे । उनको सूचना लिने र दिन कटनीको साधन युट्युब थियो । अहिले बन्द भएपछि उनी छटपटिएका छन् । उनको छटपटी र गुम्सिएको आक्रोश रिलिज गर्ने थलो जेनजीले सोमबारदेखि थालेको आन्दोलन भएको छ । विरोध प्रदर्शन हुने भएपछि उनी आफ्नो छोरासँग मोटरसाइकल चढेर माइतीघर आए । उनी माइतीघरको एउटा कुनामा बसेर आफ्नो शान्त विरोध जनाइरहेका छन् ।

‘समाचार हेर्थें । युट्युव हेर्थें । अहिले केही चल्दैन । कस्तो रिस उठ्यो । दिनभए मेरो काम हुँदैन । अनि समर्थन गर्न आन्दोलनमा आएको हुँ,’ उनले भने,’सरकारले साह्रै दु:ख दिए । नेताले सबै बेचे । अब त चिहान र घाट पनि बाँकी नराख्लान् जस्तो भो ।’

उनको अनुहार चाउरी परेको छ । ठाडो टीका लगाएका छन् । गेरु गम्छा काँधमा हालेका छन् । हेर्दा धार्मिक आस्थावान् देखिने शर्माले युवाहरूलाई आषिश दिए- ‘भगवान् यो जमातलाई रक्षा गर । यो पुस्ताले चाहिँ साँच्चै परिवर्तन ल्याओस् ।’