२०८२ असोज ३० गते ०:२३ 
News Summary
Generated by OK AI. Editorially reviewed.- नेपाली क्रिकेट टोलीका कप्तान रोहित पौडेलले लगातार दोस्रोपटक टी-२० विश्वकप खेल्ने सपना पूरा भएको बताए।
- ओमानलाई हराएपछि उनले एक वर्षदेखि देखेको सपना पूरा भएको र अब ट्रफी जित्ने लक्ष्य रहेको बताए।
- रोहितले भारतमा हुने विश्वकपमा धेरै नेपाली खेल हेर्न मैदानमा आउने विश्वास व्यक्त गरे।
३० असोज, काठमाडौं । नेपाली क्रिकेट टोलीका कप्तान रोहित पौडेलले लगातार दोस्रोपटक टी-२० विश्वकप खेल्ने सपना पूरा भएको बताएका छन् ।
बुधबार मध्यराति सम्पन्न खेलमा ओमानलाई हराएपछि कुरा गर्दै उनले एक वर्षअघिदेखि देखेको सपना पूरा भएको बताएका हुन् ।
‘हामीले झन्डै एक वर्षदेखि यो सपना देखेका थियौं, आज आएर पूरा भएको छ, म शब्दमा बयान गर्न सक्दिनँ’ उनले भने, ‘टिमलाई नै खुसी बनाएको छ यो क्षणले।’
उनले यो प्रतियोगिता महत्वपूर्ण छ भन्ने बुझेको र त्यसैअनुसार खेलेर यो नतिजा हासिल भएको बताए । उनले अब ट्रफी जित्ने लक्ष्य भएको बताए ।
उनले यो यात्रामा साथ दिने सबैलाई धन्यवाद दिए । ‘खेलाडीदेखि अफिसियल सबैको महत्वपूर्ण भूमिका छ, सबैजनालाई धन्यवाद दिन चाहन्छु’ उनले भने ।
साथै रोहितले भारतमा हुने विश्वकप भएकाले धेरैभन्दा धेरै नेपाली खेल हेर्न नेपाली मैदानमा उपस्थित हुने विश्वास व्यक्त गरे । ‘धेरै नेपालीहरू हुनुहुन्छ भारतमा, नेपालबाटै जाने पनि धेरै हुन्छन्, राम्रो वातावरण हुन्छ मैदानमा’ उनले भने ।
उनले छनोट प्रतियोगितामा भन्दा अझै उत्कृष्ट खेल प्रदर्शन गर्ने प्रतिबद्धता व्यक्त गरे ।
नेपाल र ओमान दुवै विश्वकपमा छनोट भइसकेका छन् । आजको जितपछि नेपाल ४ खेलमा ८ अंक जोडेर शीर्षस्थानमा उक्लिएको छ ।
नेपालले आइतबार यूएईलाई तथा सोमबार कतारलाई हराएको थियो ।
प्रतिक्रिया 4