५ वर्षपछि भारतबाट उडान भर्दै चाइना ईस्टर्न एयरलाइन्स

१ कात्तिक, काठमाडौं । राज्य-समर्थित चाइना ईस्टर्न एयरलाइन्सले पाँच वर्षको अन्तरालपछि नोभेम्बर ९ बाट शाङ्घाई-दिल्ली उडान पुनः सुरु गर्ने भएको छ । एयरलाइनको वेबसाइटमा अद्यावधिक सूचनाअनुसार, चीन र भारतबीच कूटनीतिक सम्बन्धमा आएको सुधारसँगै प्रत्यक्ष हवाई सम्पर्क पुनः सुरु भएको हो ।

विश्लेषकहरूले अमेरिकाको आक्रामक व्यापार नीतिहरूले पनि दुई देशबीचको सम्बन्ध सहज बनाउन प्रेरित गरिरहेको बताएका छन् ।

एयरलाइन्सको अनलाइन टिकट बिक्री प्लेटफर्मले शनिबार जानकारी गराएअनुसार यी उडानहरू बुधबार, शनिबार र आइतबार गरी सातामा तीन पटक हुनेछन्।

यस महिनाको सुरुमा भारतको विदेश मन्त्रालयले पाँच वर्षको अन्तरालपछि दुई छिमेकी देशहरूबीच व्यावसायिक उडानहरू पुनः सुरु हुने बताएको थियो।

यो घोषणा भारतीय प्रधानमन्त्री नरेन्द्र मोदीले सात वर्षभन्दा बढी समयपछि क्षेत्रीय सुरक्षा समूह साङ्घाई सहयोग सङ्गठनको शिखर बैठकका लागि चीन भ्रमण गरेपछि आएको हो।

दुई पक्षले व्यापार सम्बन्ध सुधार्ने उपायहरूबारे छलफल गरे भने मोदीले भारतको बढ्दो द्विपक्षीय व्यापार घाटाबारे चिन्ता व्यक्त गरेका थिए।

शाङ्घाई-दिल्ली उडानहरूबारे भारत र चीनका विदेश मन्त्रालयहरूले तत्काल कुनै प्रतिक्रिया नदिएका समाचार संस्था रोयटर्सले जनाएको छ ।

भारतको सबैभन्दा ठूलो एयरलाइन्स इन्डिगोले यसअघि नै कोलकाता र ग्वान्झाओ बीच दैनिक सिधा उडानहरू सुरु गर्ने घोषणा गरेको थियो।

इन्डिगोको घोषणाको समयमा, राज्य-समर्थित ग्वान्झाओ बाइयुन अन्तर्राष्ट्रिय विमानस्थलले ग्वान्झाओ र दिल्ली जस्ता थप प्रत्यक्ष मार्गहरू खोल्न एयरलाइनहरूलाई प्रोत्साहित गर्ने बताएको थियो।

सन् २०२० मा कोभिड महामारीका कारण दुई देशबीचको प्रत्यक्ष उडानहरू निलम्बित गरिएको थियो र त्यस वर्षको अन्त्यतिर हिमालय सिमानामा भएको घातक झडपका कारण लामो सैन्य गतिरोध सिर्जना भएपछि पनि उडानहरू पुनः सुरु भएका थिएनन्।

दशकौँपछिको यस भयानक हिंसामा चार चिनियाँ र २० भारतीय सिपाही मारिएका थिए।