२०८२ कात्तिक १६ गते १०:४५ 
News Summary
Generated by OK AI. Editorially reviewed.- राप्तीसोनारी नेचर रन कात्तिक २२ गते बाँकेको राप्तीसोनारीमा आयोजना हुने भएको छ।
- यसमा राप्तीसोनारी पालिका अन्तर्गतका विद्यालयका छात्रछात्राले भाग लिन पाउने रेस डाइरेक्टर चन्द्रबहादुर गुरुङले जानकारी दिए।
- धारा नेपालगन्ज म्याराथनका रणनीतिक प्रमुख तीर्थ ओलीले प्रकृतिको महत्व दर्शाउन र जागरण फैलाउन नेचर रन निरन्तरता दिने बताए।
१६ कात्तिक, नेपालगन्ज । राप्तीसोनारी नेचर रन यही कात्तिक २२ गते शनिबार बाँकेको राप्तीसोनारीमा हुने भएको छ । ११ वर्षदेखि निरन्तर आयोजना हुँदै आएको धारा नेपालगन्ज म्याराथनको भगिनी इभेन्टका रुपमा गत वर्षदेखि राप्तीसोनारी नेचर रन सुरु गरिएको हो ।
यसमा राप्तीसोनारी पालिका अन्तर्गत विद्यालयका छात्रछात्राहरुले भाग लिन पाउने रेस डाइरेक्टर चन्द्रबहादुर गुरुङले जानकारी दिए । विजेता खेलाडीलाई नगद र पदकले पुरस्कृत गरिने पनि उनले बताए ।
स्कुले बालबालिकालाई सानैदेखि प्रकृतिको महत्व दर्शाउन र प्राकृतिक स्रोत साधनको जगेर्ना र सदुपयोग सम्बन्धी जागरण फैलाउने उद्देश्यले राप्तीसोनारी नेचर रन हरेक वर्ष निरन्तरता दिइने धारा नेपालगन्ज म्याराथनका रणनीतिक एवं अन्तर्राष्ट्रिय समन्वय प्रमुख तीर्थ ओलीले बताए । राप्तीसोनारीमा जन्मिएका ओली हाल जर्मनीमा एथ्लेटिक्स प्रशिक्षकका रुपमा कार्यरत छन् ।
विश्व दौडको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस(एम्स)को पुर्णकालीन सदस्य नेपालगन्ज म्याराथनको भगिनी रेस इभेन्टका रुपमा नेपालगन्ज १० नाइट रन, गौघाट ग्रीन रन, काठमाडौं २५के हेरिटेज रेस, कर्णाली हाफ म्याारथन लगायत रहेका छन् । देशको बिषम परिस्थितिका कारण नाइट रन स्थगन गरियो भने गौघाट ग्रीन र असोज २८ गते दोस्रो संस्करण सम्पन्न गरियो ।
वातावरण संरक्षणमा अभियान चलाइरहेकी मिस नेपाल २०२३ श्रृच्छा प्रधान र कमनवेल्थ गेम्स २०१०का स्वर्णधारी केन्यानिवासी जोन केलाई समेतको उपस्थितिमा गौघाट ग्रीन रन निरन्तरता दिन सफल भएको थियो । राप्तीसोनारी नेचर रनमा समेत यस्ता सेलिब्रिटीलाई जोड्दै लैजाने तयारी रहेको धारा नेपालगन्ज म्याराथनका कार्यक्रम संयोजक कपिल थापाले बताएका छन् ।
नेपालगन्ज म्याराथन भने मंसिर ६ गते हुनेछ ।
प्रतिक्रिया 4