हरियो धनियाँ र काँक्रोमा भेटियो अत्यधिक विषादी

News Summary

Generated by OK AI. Editorially reviewed.

कालीमाटी फलफूल तथा तरकारी बजारमा हरियो धनियाँमा ५५.२९ प्रतिशत र काँक्रोमा ४६.५ प्रतिशत 'अर्गानोफस्फेट' विषादी भेटिएको छ।
केन्द्रीय कृषि प्रयोगशालाले १५ पसलका तरकारी तथा फलफूल परीक्षण गर्दा विषादीको मात्रा ३५ प्रतिशतभन्दा बढी हुँदा ती तरकारी उपभोग अयोग्य रहेको बताएको छ।
यसअघि पनि कालीमाटी बजारमा हरियो फर्सी, काँक्रो, घिरौँला र अकबरे खुर्सानीमा अत्यधिक विषादी भेटिएको थियो।

४ मंसिर, काठमाडौं । मुलुककै सबैभन्दा ठूलो फलफूल तथा तरकारी बजार कालीमाटीमा भित्रिएको हरियो धनियाँ र काँक्रोमा अत्यधिक मात्रामा विषादी भेटिएको छ ।

बिहीबार भक्तपुरबाट बिक्रीका लागि कालीमाटी बजारमा ल्याइएको हरियो धनियाँमा ५५.२९ प्रतिशत र नवलपरासीबाट ल्याइएको काँक्रोमा ४६.५ प्रतिशत ‘अर्गानोफस्फेट’ नामक विषादी भेटिएको कालीमाटी फलफूल तथा तरकारी बजार विकास समितिले जनाएको छ ।

केन्द्रीय कृषि प्रयोगशालाले बिहीबार कालीमाटी तरकारी बजारका १५ पसलको १५ थरी तरकारी तथा फलफूल परीक्षण गरेको थियो । परीक्षण क्रममा हरियो धनियाँ र काँक्रोमा उक्त मात्रामा विषादी भेटिएको हो । विषादीको मात्रा धेरै भेटिएको उक्त धनियाँ र काँक्रो उपभोग अयोग्य रहेको जनाइएको छ ।

सरकारले रोकावट गरेको दर ३५ प्रतिशतभन्दा कम हुँदा उपभोग योग्य मानिन्छ । ३५ देखि ४५ प्रतिशत पाइए केही दिन राखेर मात्रै उपभोग गर्न सकिने मापदण्ड छ।

यस्तै ४५ प्रतिशतभन्दा बढी भयो भने त्यस्ता तरकारी उपभोगका लागि अयोग्य मानिएको छ ।

यस्तै २३ असोजमा मात्रै कालीमाटी तरकारी बजारमै बेच्न ल्याइएको हरियो फर्सी, काँक्रो र घिरौँलामा अत्यधिक मात्रामा विषादी भेटिएको थियो । त्यसपछि ३० असोजमा मकवानपुरबाट बेच्न ल्याइएको अकबरे खुर्सानीमा अत्यधिक विषादी भेटिएको थियो ।

यसअघि असार अन्तिम साता पनि पनि रायो साग, घिउसिमी लगायत तरकारीमा अत्यधिक मात्रामा विषादी भेटिएको थियो ।