‘इन्गेजमेन्ट’ को बचाउमा साम्राज्ञी : हाम्रो प्रेमको रक्षा गर्ने वाचा गर्छौं

News Summary

Generated by OK AI. Editorially reviewed.

अभिनेत्री साम्राज्ञी शाहले एक्टर विशाल खरेलसँग कानूनी रूपमा मंगेतर दर्ता भएको र इन्गेजमेन्टमा पछुतो नभएको बताएकी छिन्।
साम्राज्ञीले विशाल विवाहित भएको आरोप खण्डन गर्दै आफूले कहिल्यै विवाहित पुरुषसँग सम्बन्ध नराख्ने दावी गरिन्।
विशालकी पूर्वपत्नीले थाइल्याण्डमा विशालसँग बेड सेयर गरेको स्वीकारेपछि आफूहरू अलग भएको दाबी गरेकी छिन्।

काठमाडौं । अभिनेत्री साम्राज्ञी शाहले आफ्नो इन्गेजमेन्टलाई लिएर भैरहेको विवादमा मुख खोलेकी छिन् । उनले गतसाता एक्टर तथा मोडल विशाल खरेलसँग इन्गेजमेन्ट गरेकी थिइन् ।

बुधबार अपरान्ह इन्स्टाग्राम स्टोरीमार्फत साम्राज्ञीले ‘इन्गेजमेन्ट’ गर्ने निर्णयको बचाउ गरेकी छिन् । ‘मंगेतर’ को रुपमा आफूहरू कानूनीरुपमा दर्ता भएको जनाउँदै उनले इन्गेजमेन्ट गरेकोमा कुनै पछुतो नभएको बताएकी छिन् ।

विशाल विवाहित रहेको भन्ने थाहा हुँदाहुँदै सम्बन्ध अघि बढाएको भन्ने सामाजिक सञ्जाल प्रयोगकर्ता तथा विशालकी पूर्वपत्नीको आरोपको पनि साम्राज्ञीले खण्डन गरेकी छिन् ।

उनले दावी गरेकी छिन्, ‘ म कहिल्यै विवाहित पुरुषसँग डेट गर्दिन वा इन्गेजमेन्ट गर्दिन र परिवार तोड्ने छैन ।’ आलोचना र विरोधले आफूहरूको निर्णयलाई फरक नपर्ने बताउँदै साम्राज्ञीले प्रेमको रक्षा गर्ने बताएकी छिन् ।

साम्राज्ञी र विशालकी पूर्वपत्नीको दावी आ-आफ्नै देखिन्छ । विशालकी पूर्वपत्नीले थाइल्याण्डमा आफ्नो पूर्वपतिले साम्राज्ञीसँग ‘बेड सेयर’ गरेको कुरा स्वीकारेपछि आफूहरू अलग रहेको दावी गरेकी छन् ।

यता, साम्राज्ञीले भने विशाल पहिले नै ‘मुभ अन’ भैसकेको अर्थात पहिल्यै नै उसको पूर्वपत्नीबाट अलग भैसकेको दावी गरेकी छिन् । यसबारे विशालले भने प्रतिक्रिया दिइसकेका छैनन् ।

साम्राज्ञीले के लेखिन् ?

‘जतिबेला हामीले आशा गुमाएका थियौं, त्यतिबेला हामीले एकअर्काको माया पायौं । दुर्भाग्यवश हामीसँग दुवैको विगत थियो, जुन सबैसँग हुन्छ । यसमा हामीलाई पछुतो छैन । हामीले जीवनमा अगाडि बढ्ने निर्णय गर्‍यौं । मैले कहिल्यै विवाहित पुरुषसँग डेट वा इन्गेजमेन्ट गर्दिन र परिवार तोड्दिन पनि । ऊ पहिले नै धेरै अघि बढिसकेको थियो । हामी इन्गेजमेन्ट भएका छौं र कानुनी रूपमा मंगेतरको रूपमा दर्ता भएका छौं । हामी यसलाई सुरक्षित राख्ने, हाम्रो प्रेमको रक्षा गर्ने र खुसी हुने वाचा गर्छौं र हामीलाई यसले केही पनि परिवर्तन गर्ने छैन । कसैलाई मूल्यांकन गर्नुअघि, कृपया सम्झनुहोस् कि सिक्काका दुई पाटा छन् त्यसैले मेरो खुशीको मजाक उडाउन बन्द गर्नुहोस् । कृपया आफ्नो भ्यूजको लागि मेरो नाम प्रयोग गर्न बन्द गर्नुहोस् र मलाई शान्तिपूर्वक बाँच्न दिनुहोस् ।’