एमालेलाई जनमोर्चाको शुभकामना – सही नेतृत्व चयनमा महाधिवेशनले भूमिका खेलोस्

Listen News

News Summary

Generated by OK AI. Editorially reviewed.

राष्ट्रिय जनमोर्चाका महासचिव मनोज भट्टले नेकपा एमालेको ११औं महाधिवेशनले सही नेतृत्व चयनमा भूमिका खेलोस् भनेर शुभकामना दिएका छन्।
भट्टले जेनजी आन्दोलनपछि सरकार अपदस्त र प्रतिनिधिसभा विघटन भएको भन्दै वर्तमान सरकार गठनलाई असंवैधानिक भनेका छन्।
उहाँले एमालेको महाधिवेशनले राजनीतिक कमजोरी र जनजिविकाको सवाल सम्बोधन गर्न समीक्षा गर्नुपर्ने सुझाव दिएका छन्।

२७ मंसिर, काठमाडौं । राष्ट्रिय जनमोर्चाका महासचिव मनोज भट्टले सही नेतृत्व चयनमा ११ औं महाधिवेशनले भूमिका खेलोस् भनेर नेकपा एमालेलाई शुभकामना दिएका छन् ।

भक्तपुरको सल्लाघारीस्थित खुल्लाचौरमा एमालेको ११औं महाधिवेशनको उद्घाटन कार्यक्रमलाई सम्बोधन गर्दै उनले यस्तो बताएका हुन् ।

‘महाधिवेशन भव्यताको साथ सफल होस् र यसले सही नेतृत्व चयनमा महत्वपूर्ण भूमिका खेलोस् भन्ने शुभकामना दिन चाहन्छु र त्यही प्रकारको अपेक्षा राख्न चाहन्छु’ उनले भने ।

जेनजी आन्दोलनबाट जननिर्वाचित सरकार अपदस्त हुन पुगेको र प्रतिनिधिसभा नै विघटन हुन पुगेको भन्दै उनले सरकार गठनलाई असंवैधानिक भनेका छन् ।

यो परिस्थितिमा एमालेको महाधिवेशन हुन लागिरहेको भन्दै उनले सचेत हुन आवश्यक रहेको बताए ।

गणतन्त्र प्राप्तीपछि पनि राजनीतिक दलहरूका बीचमा कसिलो मेल नहुँदा बाह्य शक्तिले खेल्ने मौका पाएको उनले बताए । एमालेको महाधिवेशनले कहाँ–कहाँ चुकियो भनेर समीक्षा गर्न सक्नुपर्ने उनले स्मरण गरे ।

जेनजी आन्दोलनका नाममा प्रहारको निशाना गणतन्त्रवादी नेताहरू हुन पुगेको भन्दै उनले सचेत हुन आवश्यक रहेको बताए । कहाँनेर शासकीय स्वरुपमा कमजोरी भयो, कहाँ भनेर जनजिविकाको सवाल सम्बोधन गर्न सकिएन ख्याल गर्न आवश्यक रहेको सुझाव दिए ।