आइटी व्यवसायमा सक्रिय डुम्रे अब संसद् प्रवेश

२९ फागुन, स्याङ्जा । सूचना प्रविधि (आइटी) तथा अन्य व्यावसायिक क्षेत्रमा सक्रिय रहँदै आएका स्याङ्जाका युवा झविलाल डुम्रे प्रतिनिधिसभामा निर्वाचित भएका छन् । स्याङ्जा क्षेत्र नम्बर–२ बाट राष्ट्रिय स्वतन्त्र पार्टी (रास्वपा)का उम्मेदवार बनेका डुम्रे फराकिलो मतान्तरसहित विजयी भएका हुन् ।

डुम्रेले २५ हजार ३५४ मतसहित जित निकाल्दा कांग्रेसका उम्मेदवार भागवतप्रकाश मल्लले २० हजार ८३० मत प्राप्त गरे ।

विजेता डुम्रे राजनीतिमा नयाँ भएपनि सामाजिक र सङ्गठनात्मक गतिविधिमा भने लामो समयदेखि सक्रिय छन् । रास्वपा स्थापना भएपछि उनले संगठन विस्तारमा सक्रिय भूमिका खेलेका थिए ।

वालिङ नगरपालिका- १४ छोरेखर्कमा २०४९ साल साउन ५ गते जन्मिएका डुम्रेले स्नातकोत्तर तहसम्म अध्ययन गरेका छन् । व्यावसायिक क्षेत्रमा सक्रिय उनी आफ्ना उद्योगमार्फत करिब दुई सय जनालाई प्रत्यक्ष रोजगारी प्रदान गरेका छन् ।

पछिल्लो समय पोखरा कर्मथलो बनाएर व्यवसाय र सामाजिक कार्यमा सक्रिय रहेका डुम्रे अब संसद् यात्रा गर्दै छन् । चुनावी अभियानका क्रममा उनले रोजगारी सिर्जना, उद्यमशीलताको विकास, भ्रष्टाचार नियन्त्रण, सुशासन स्थापना तथा स्याङ्जामा कृषि, पर्यटन र उद्योगको सम्भावना उपयोग गर्ने एजेन्डा अघि सारेका थिए ।

‘स्याङ्जा–२ को विकासलाई केन्द्रमा राखेर अघि बढ्नेछु,’ डुम्रेले भने, ‘रोजगारी सिर्जना, उद्यमशीलता प्रवर्द्धन, कृषि आधुनिकीकरण, पर्यटन विकास र सुशासन स्थापनामा मेरो ध्यान केन्द्रित हुनेछ ।’ स्थानीय उत्पादनलाई बजारसँग जोड्ने, उद्योग तथा लगानी भित्र्याउने र विकासका योजनामा पारदर्शिता कायम गर्ने उनको प्रतिबद्धता छ ।