समानुपातिक सांसद छनोटले हर्क साम्पाङको टाउको दुखाइ

News Summary

Generated by OK AI. Editorially reviewed.

निर्वाचन आयोगले समानुपातिक तर्फ दलहरूले जितेको सिट संख्या निर्धारण गरेपछि श्रम संस्कृति पार्टीमा सांसद आकांक्षीहरूको दौडधुप सुरु भएको छ।
पार्टी अध्यक्ष हर्क साम्पाङले समानुपातिक सांसद छनोटमा विवाद हुँदा सामाजिक सञ्जालमा भात खाऊ, मेरो टाउको नखाऊ लेखेर असन्तुष्टि व्यक्त गरेका छन्।
समानुपातिक सांसद बन्ने नाम तीन दिनभित्र आयोगलाई बुझाउनुपर्ने भएकाले पार्टीभित्र महिला र जातीय प्रतिनिधित्वसम्बन्धी दबाब र विवाद बढेको छ।

२९ फागुन, सुनसरी । निर्वाचन आयोगले समानुपातिक तर्फ दलहरूले जितेको सिट संख्या निर्धारण गरे लगत्तै श्रम संस्कृति पार्टीमा सांसदका आकांक्षीहरूको दौडधुप सुरु भएको छ । समानुपातिकको बन्द सूचीमा नाम भएका कतिपयले सामाजिक सञ्जालमार्फत आफू सांसद बन्न पाउनु पर्ने धारणा सार्वजनिक गरिरहेका छन् ।

समानुपातिक तर्फ ४ सिट जितेको यो पार्टीका अध्यक्ष हर्क साम्पाङलाई सांसद छनोट टाउको दुखाइ भइसकेको छ । यो कुरा साम्पाङले सामाजिक सञ्जाल फेसबुक समेत लेखेका छन् ।

सुनसरी–१ बाट निर्वाचित सांसद समेत रहेका साम्पाङले लेखेका छन्, ‘भात खाऊ । मेरो टाउको नखाऊ ।’ यति लेखेर चित्त नबुझेर होला उनले अझै प्रष्ट पार्दै लेखेका छन्, ‘समानुपातिक विषयमा रोइलो गर्ने जति सबैलाई साधारण सदस्य समेत नरहने गरी पार्टीबाट निष्काशन गर्नेछु । हद भो !’

श्रम संस्कृतिले आयोगमा बुझाएको बन्दसूचीमा रहेकी समला साम्पाङ राई, आशा लामा लगायतले सामाजिक सञ्जाल र विभिन्न मिडियामार्फत आफ्नो आकांक्षा सार्वजनिक गरिसकेका छन् ।

समलाले अध्यक्ष साम्पाङले आफूलाई नै समानुपातिक सांसद बनाउनुपर्ने भन्दै फेसबुकमा पोष्ट समेत गरेकी छन् । उनले लेखेकी छन्, ‘दाजु (हर्कराज साम्पाङ) कुरा गर्नु छ भन्दा नि पर जा पर जा भन्ने नत्र बहिनी यस्तो समस्या छ, तिमीहरूले दुःख गर्‍यौ, समानुपातिकमा यो समस्या छ । अरू जाओस् भनेर एकपटक सम्झाउनु भयो । मैले कुरा कति राख्न खोज्दा । साम्पाङ भाषाबाट पनि भनिन कि, मैले हरेक कुरामा बचाउने मेरो कुरा सुनुवाइ किन भएन, कारण के हो ? बाध्यता भयो मिडियामा बोलिहालेँ । के म गलतै छु त भने कोही कसैले भन्नुहोला ।’

पार्टीको साधारण सदस्य समलाले धरानका अन्य मिडियालाई पनि समानुपातिक सांसद आफू हुनुपर्ने अडान राख्दै अन्तर्वार्ता दिएकी छन् । उनले बिहीबार राति सामाजिक सञ्जालमा पार्टीमा आफ्नो धेरै योगदान रहेकाले सांसद बन्न पाउनु पर्ने उल्लेख गरेकी छन् ।

समलाको नाम आदिवासी जनजाति महिलाको १६औं नम्बरमा छ ।

त्यस्तै, बन्दसूचीमा नाम भएकी आशा लामाले समानुपातिकमा आफूलाई नलगे हर्क साम्पाङको घरमा धर्ना बस्ने धम्की दिएको उल्लेख गरेकी छन् । आदिवासी जनजाति महिला तर्फ लामाको नाम तेस्रो नम्बर छ । लामा आफू नै समानुपातिक सांसद हुनुपर्ने भन्दै दबाब दिन काठमाडौंबाट धरान आएकी छन् ।

प्रत्यक्षतर्फबाट निर्वाचित अध्यक्ष साम्पाङ, ध्रुवराज राई र आरेन राई तीनै जना आदिवासी जनजाति क्लस्टरका पुरुष हुन् । श्रम संस्कृतिले समानुपातिकका चार मध्ये तीन सांसद महिला पठाउनु पर्ने देखिन्छ । किनभने उसको कुल सात मध्ये ३३.३३ प्रतिशत महिला हुनै पर्दछ ।

लैंगिक मात्र होइन खसआर्य, आदिवासी जनजाति, दलित, मधेशी, मुस्लिम, थारू क्लस्टर पनि मिलाएर पठाउनु पर्ने हुन्छ ।

आयोगले समानुपातिकबाट सांसद बन्नेहरूको नाम तीन दिनभित्र बुझाउन भनेको छ ।