बाँसुरी बजाएर हालान्डको मन जितेकी विधि

२१ वर्षीया विधि क्षेत्रीलाई हातमा बाँसुरी भए धेरै थोक नभए पनि हुन्छ । 

एक त बाँसुरी कृष्णको बाजा, अर्को विधि आफैं कृष्णभक्त । विधिलाई उसै पुग्ने भइहाल्यो । यस सँगै बाँसुरी बजाउँदा उनलाई मनैदेखि शान्त महसुस हुन्छ । जुन अनुभव उनले अरू थोकमा विरलै पाउँछिन् । पढाइको विषय इन्जिनियरिङ भए पनि सामाजिक सञ्जालमा आफूलाई उनले बाँसुरीवादकको रूपमा चिनाइरहेकी छिन् ।

ठीक यो समयमा त, उनी बाँसुरीकै कारण एकाएक चर्चामा आएकी छिन् । किनकि उनले बाँसुरी बजाएरै विश्व फुटबलको पोस्टर ब्वाई अर्लिङ हालान्डको मन जितेकी छिन् । भर्खरै मात्र सकिएको फिफा विश्वकपमा हालान्ड चर्चाको शिखरमा थिए । 

नर्वे र म्यानचेस्टर सिटीका स्टार हालान्ड फुटबल फ्यानका लागि परिचित स्टार हुन् । तर, यस विश्वकपबाट उनी आम व्यक्तिमाझ पनि छाए । विश्वकपमा ७ गोल गरेका उनको टोली अन्तिम ८ बाट बाहिरियो । 

यही माहोलमा विधिले हालान्डलाई समर्पित गर्दै बाँसुरी कभर गरेको रिल्स इन्स्टाग्राम राखिन् । यसमा हालान्डले नाइस भनेर कमेन्ट गरेका छन् । 

स्कुलको कक्षादेखि इन्जिनियरिङसम्म

विधि काठमाडौंमै जुन्मे, हुर्केकी हुन् । विद्यालय तहको पढाइ ग्यालेक्सी पब्लिक स्कुलबाट भएको थियो । स्कुलमा पढ्दै गर्दा वैकल्पिक कक्षाका रूपमा उनले प्रेम वाइबा नामका गुरुबाट बाँसुरी समात्न र फुक्न सिकेकी थिइन् । त्यहाँ उनले ६ देखि १० कक्षासम्मै बाँसुरी सिकिन् । २०२० मा एसईई सक्काइन् । 

स्कुलपछि बाँसुरी कक्षा छुटे पनि विधिमा बाँसुरीप्रतिको झुकाव बढ्दै गयो । त्यसपछि आफैंले अभ्यास गर्न थालिन् । स्वअध्ययन गर्न सिकिन् ।

१२ कक्षा सकिएपछि उनी पढाइको सिलसिलामा भारत गइन् । अहिले पनि उनी देहरादुनस्थित डीआईटी युनिभर्सिटीमा बिटेक इन कम्युटर इन्जिनियरिङ गर्दै छिन् । नेपालमा हालै उनी सेमेस्टरको छुट्टीमा आएकी हुन् ।

ठीक यही बेला विश्वकप पनि चलिरहेको थियो ।

उनले विश्वकपका खेलहरू हेरिरहेकी थिइन् । उनी फुटबल फ्यान पनि हुन् । हालान्डलाई उनले पहिलेदेखि नै फलो गरेकी थिइन् । हालान्ड उनको मन पर्ने खेलाडी पनि हुन् । यो विश्वकपमा तिनै हालान्ड सामाजिक सञ्जालमा ‘बज’ नै भए । मिमदेखि लिएर रिल्सहरूमा अन्य खेलाडीहरूको तुलनामा हालान्ड हाबी भए । 

त्यसमाथि प्रशंसकहरूले हालान्डमाथि केही गीतहरू समेत बनाए । 

ती सबैमध्ये हालान्ड च्यान्ट भाइरल भइदियो । हा हा हा हालान्ड… गर्दै सुरु हुने यो गीतलाई हालान्ड एन्थम भनियो । तर, हालान्ड स्वयंले यो गीत निकालेका होइनन् । जर्मन पप ब्यान्ड जिङ्गिस खानले सन् १९७९ मा निकालेको डिस्को गीत मोस्काउको यो क्लोन भर्सन हो । 

त्यसमाथि यो च्यान्ट अहिलेको विश्वकपभन्दा धेरै अघिदेखि नै सुरु भइसकेको थियो । सन् २०२२ मा हालान्ड म्यानचेस्टर सिटीमा आबद्ध भएर लगालग गोल गर्न थालेपछि सिटीका फ्यानहरूले त्यतिबैलै यो च्यान्ट बनाएका थिए।

अत्याधिक चर्चामा आएको भने यो विश्वकपमा हो ।

हालान्डको त्यो कमेन्ट

यसपटक विधिले हालान्डको त्यो माहोललाई समात्ने कोसिस गरिन्, बाँसुरी बजाएर । गत ३ साउनमा हा हा हा हालान्ड लाई उनले नर्वेको जर्सी लगाएर कभर गरिन् । र, रिल्स इन्स्टाग्राममा पोस्ट गरिन् ।

रिल्समा उनले टेक्स्ट पनि सँगै लेखिन् – इन्स्टाग्राम इज कुल विकाउज आई क्यान कभर दी हालान्ड एन्थम एन्ड सम गाइ नेम्ड अर्लिङ विल कमेन्ट नाइस

त्यसपछिको छोटो समयमा नै विधिको त्यो रिल्स भाइरल बन्न गयो ।

विधिका प्रशंसकहरूले लगातार हालान्डलाई कमेन्टमा मेन्सन गर्न थाले । यसअघि उनका केही भिडियोहरू भाइरल त भएको थियो । तर, हालान्डलाई समर्पित गर्दै बनाएको त्यो रिल्सले ती सबैलाई उछिन्यो ।

त्यस बीचमा उनको त्यो रिल्समा बोस्निया (@bosnia) बाट पनि कमेन्ट आयो । फ्यानहरूले हालान्डसँगै यो पेजलाई पनि मेन्सन गरिरहेका थिए । बोस्निया मिम पेज हो । यो पेजका पोस्टहरूमा हालान्डले धेरै पटक कमेन्ट र प्रतिक्रिया दिएका छन् । पेजले पनि हालान्डमाथि थुप्रै कन्टेन्ट बनाएका छन् ।

अब सोही पेजबाट कमेन्ट आएपछि विधिलाई कताकता हालान्डको पनि कमेन्ट आउँछ कि भन्ने आशा पलायो । त्यसपछि उनले क्षणक्षणमा नोटिफिकेसन हेरिरहिन् ।

नभन्दै ४ साउनमा हि कमेन्टेड भन्ने नोटिफिकेसनको ओइरो लाग्यो । विधिको खुसीको सीमा रहेन । किनकि हालान्डले नाइस लेख्दै विधिको उक्त रिल्समा कमेन्ट गरेका थिए ।

 

View this post on Instagram

 

A post shared by Vidhi Chhetri (@vidhichhetri.14)

त्यसपछि त विधिको यो सफलता केही बेरमै नेपाली सोसल मिडिया स्पेयरमा पनि भाइरल भयो ।

‘सुरुमा त अपेक्षा नै गरेको थिइनँ उहाँले कमेन्ट गर्नुहोला भनेर,’ हालान्डको प्रतिक्रिया देख्दाको क्षण उनी सुनाउँछिन् । अहिले उनको उक्त रिल्समा नर्वे एफएसहित अन्य अन्तर्राष्ट्रिय संस्थाहरूले समेत प्रतिक्रिया दिइरहेका छन् । साथै यस सामग्री तयार पार्दासम्म विधिको भिडियोमा १ करोड ३० लाख बढी भ्युज प्राप्त भइसकेको छ ।

अपार्ट फर्म भाइरल रिल्स

विधिले बाँसुरीको कभर गर्न थालेको केही वर्ष भइसकेको छ । सुरु सुरुमा बाँसुरीमा कुनै गीतको कभर गर्न खोज्दा उनलाई नोटेसन भेट्टाउन गाह्रो हुन्थ्यो । कुनै भेटिन्थ्यो कुनैको भेटिन्थ्यो । तर, उनले कुनै धुन सुनेरै त्यसको नोटेसन थाहा पाउने सिकिन् ।

आजकल अरूले पनि सिक्न सकुन् भनेर आफूले कभर गर्ने गीतको बाँसुरीका लागि उनी नोटेसनहरू तयार पार्छिन् । र, तिनलाई भिडियोमा समेत राख्छिन् । 

‘धेरैजसो गीतको नोटेसन अनलाइनमा भेटिँदैन, त्यसैले म आफैँ नोटहरू निकालेर हाल्दिन्छु ताकि अरूलाई सजिलो होस्’ उनी सुनाउँछिन् ।

अब उनी केही दिनमै पढाइका लागि भारत फर्किँदै छिन् । यो अनुभव आजीवनका लागि बनाएकोमा उनी आफूले आफूलाई गर्व पनि गर्छिन् । तर, पढाइ र संगीत फरकफरक भएकाले आगामी दिनमा यी दुवैलाई सँगै अगाडि बढाउने उनको योजना छ । सके शास्त्रीय संगीत सिक्ने रहर छ ।