२०८३ साउन ३१ गते ११:०५ 
News Summary
Generated by OK AI. Editorially reviewed.- बंगलादेशले अस्ट्रेलियालाई उसकै भूमिमा पहिलोपटक टेस्ट क्रिकेटमा पराजित गर्दै ऐतिहासिक सफलता हात पारेको छ।
- डार्विनमा भएको खेलमा बंगलादेशले अस्ट्रेलियालाई ९ विकेटले हराउँदै टेस्ट इतिहासमा नयाँ अध्याय थपेको हो।
- मेहदी हसन मिराजले दोस्रो इनिङमा ५ विकेट लिँदै बंगलादेशको जितमा निर्णायक भूमिका निर्वाह गर्नुभएको छ।
३१ साउन, काठमाडौं । बंगलादेशले अस्ट्रेलियालाई उसकै भूमिमा पहिलोपटक टेस्ट क्रिकेटमा पराजित गर्दै ऐतिहासिक सफलता हात पारेको छ । डार्विनमा भएको पहिलो टेस्टमा बंगलादेशले अस्ट्रेलियालाई ९ विकेटले हराउँदै टेस्ट इतिहासमा नयाँ अध्याय थपेको हो ।
बंगलादेशले दोस्रो इनिङमा जितका लागि पाएको ५७ रनको सामान्य लक्ष्य एक विकेट गुमाएर पूरा गर्यो । यससँगै बंगलादेशले अस्ट्रेलियामा आफ्नो पहिलो टेस्ट जित मात्र हात पारेन, शीर्ष वरीयताको टोलीविरुद्ध घरेलु मैदानबाहिर स्मरणीय जितसमेत दर्ता गरायो ।
बंगलादेशको जितमा अफस्पिनर मेहदी हसन मिराज नायक बने । उनले दोस्रो इनिङमा ५ विकेट लिँदै अस्ट्रेलियालाई २८४ रनमै समेट्न महत्वपूर्ण भूमिका खेले । अस्ट्रेलियाले पहिलो इनिङमा १९८ रन बनाएको थियो भने बंगलादेशले जवाफमा ४२६ रन जोड्दै २२८ रनको विशाल अग्रता लिएको थियो ।
पहिलो इनिङमा बंगलादेशका तान्जिद हसनले १०१ रनको शतकीय पारी खेले । उनी अस्ट्रेलियाको भूमिमा टेस्ट शतक बनाउने पहिलो बंगलादेशी ब्याटर बने । नजमुल हुसैन शान्तोले ८४ तथा मेहदीले ६५ रन बनाएपछि बंगलादेशले बलियो स्कोर खडा गरेको थियो ।
यसअघि पहिलो इनिङमा अस्ट्रेलियालाई सस्तैमा समेट्ने क्रममा तीव्र गतिका बलर हसन महमुदले ६ विकेट लिएका थिए । उनले ५५ रन खर्चेर ६ विकेट लिँदै आफ्नो करियरकै उत्कृष्ट टेस्ट बलिङ प्रदर्शन गरे । अस्ट्रेलियाका लागि स्टिभ स्मिथले ७१ रन बनाए पनि अन्य ब्याटरले ठूलो योगदान दिन सकेनन् ।
अस्ट्रेलियाले दोस्रो इनिङमा केही सुधार गर्दै २८४ रन बनाए पनि बंगलादेशको पहिलो इनिङको अग्रता धेरै मेटाउन सकेन । क्यामरन ग्रीनले शतक बनाउँदै अस्ट्रेलियाको अग्रता बढाउने प्रयास गरेपनि उक्त अग्रता दोहोरो अंकमै सीमित भयो ।
मेहदीले ६६ रन खर्चेर पाँच विकेट लिएपछि घरेलु टोली ५७ रनको लक्ष्य छाड्दै अलआउट भएको थियो ।
यो जित बंगलादेशका लागि अस्ट्रेलियाविरुद्ध टेस्ट क्रिकेटमा विशेष उपलब्धि बनेको छ । यसअघि अस्ट्रेलियासँग खेलेका टेस्टमध्ये बंगलादेशले एक खेल जिते पनि त्यो जित बंगलादेशमै भएको थियो । अस्ट्रेलियाको भूमिमा भने उसले पहिलोपटक जित निकाल्न सफल भएको हो ।
दुई टोलीबीचको यो शृंखला विश्व टेस्ट च्याम्पियनसिप अन्तर्गत रहेको छ । पहिलो टेस्टमा ऐतिहासिक जित निकालेसँगै बंगलादेशले दोस्रो टेस्टअघि आत्मविश्वाससमेत बलियो बनाएको छ ।
दोस्रो टेस्ट अगस्ट २२ देखि म्याकेमा सुरु हुनेछ ।
प्रतिक्रिया 4