फेरिएको चर्च ब्वाइज

२०८० माघ १७ गते १०:२३

१७ माघ, पोखरा । चर्च ब्वाइज युनाइटेड शहीद स्मारक ए डिभिजन लिगको च्याम्पियन टिम हो । ए डिभजन डेब्यूमै उपाधि जित्दै चर्च ब्वाइजले तीन श्रेणीको लिग लगातार जित्ने मनाङ मर्स्याङ्दीको कीर्तिमान बराबरी गरेको थियो ।

गत सिजनको लिग २०७९ मा सुरु भएर २०८० जेठमा सकिएको थियो । जहाँ ए डिभिजन लिग डेब्यूमै च्याम्पियन बनेर चर्च ब्वाइज घरेलु फुटबलको नयाँ शक्तिको रुपमा उदायो थियो । उसले घरेलु फुटबलकै राम्रा खेलाडीहरु समेत अनुबन्ध गरेको थियो ।

तर त्यसपछि ए डिभिजन लिग भएको छैन । राष्ट्रिय टिमका खेलाडी विदेशिने क्रम जारी रहेको बेला चर्च ब्वाइजलाई लिग जिताउने टिमका सदस्य नफेरिने कुरै भएन ।

चर्च ब्वाइजको टिम फेरिए पनि उसको जितको लय भने कायमै छ । मंगलबार पोखरामा २३औं आहारारा पोखरा गोल्डकपमा सर्वाधिक ६ पटकको च्याम्पियन नेपाल पुलिस क्लबलाई १-० ले पराजित गर्दै चर्च ब्वाइज सेमिफाइनल पुग्यो ।

ए डिभिजन लिग जित्दामा अनन्त तामाङले चर्च ब्वाइजको कप्तानी गरेका थिए भने अन्जन विष्ट, एरिक विष्ट, आशिष चौधरी, सुभाष गुरुङका साथमा अनुभवी विदेशी खेलाडीहरु समेत थिए ।

तर ती कोही पनि मंगलबार पोखरा रंगशालमा देखिएनन् । अनन्त टिममा रहे पनि पूर्ण रुपमा फिट नभएकोले पुलिस विरुद्ध मैदान उत्रिएनन् । त्यसैले कमल श्रेष्ठले कप्तानी गरे ।

राष्ट्रिय टिमकै संयुक्त रुपमा सर्वाधिक गोलकर्ता रहेका अन्जन विष्टले चर्च ब्वाइज छाडेर संकटाबाट पोखरामा खेले । अन्जनले अब मोफसलमा हुने प्रतियोगिता संकटाबाटै खेल्ने छन् । राष्ट्रिय टिमकै मिडफिल्डर एरिक विष्ट भारतको आई लिग क्लब शिलोङ लाजोङमा अनुबन्ध भएका छन् ।

राष्ट्रिय टिमबाट खेलिसकेका सुभाष गुरुङले मछिन्द्र एफसीबाट आहारारा खेले । राष्ट्रिय टिमकै अर्का सदस्य आशिष चौधरी पनि चर्च ब्वाइज छाडेर मछिन्द्रबाट खेल्ने चर्चा भए पनि उनले कुनै क्लबबाट पोखरामा खेलेनन् । अर्का आशिष चापागाईंसँगै विवेक पौडेल र मौसम सुब्बाले पोखरामा थ्री स्टारबाट आहारारा खेले ।

यसबाहेक ए डिभिजन लिग च्याम्पियन बनाउन भूमिका खेलेका विदेशी खेलाडीहरु गोलकिपर प्रिस, डिफेण्डर फ्रांकलिन कुएटे टाला, जोसेफ ओसुबा बेम्वाह र रन्जित सिंह पान्द्रे पनि टिममा छैनन् ।

अधिकांश खेलाडीहरु अहिले टिममा नहुँदा ए डिभिजन लिग जित्ने टिममा पहिलो रोजाईंमा खेलेका अनन्त र कमल अनि दोस्रो रोजाइका गोलकिपर रेम्बोकुमार चौधरी, डिफेण्डर विक राई र मनिष जर्घा मगर, मिडफिल्डर प्रशान्त लक्षम गरी ६ खेलाडी मात्र आहारारा गोल्डकप खेल्ने टिमसँग पोखरामा छन् ।

पछिल्लो समय नियमित घरेलु लिग नहुने र खेलाडीहरु विदेशिने क्रम जारी रहँदा क्लबहरु उपलब्ध खेलाडी जम्मा पारेर पोखरामा आइपुगेका हुन् ।

यसपटक विदेशी खेलाडीले पनि आहारारा खेल्न पाएका छैनन् । जसले गर्दा पनि क्लबहरुलाई टिम सेट गर्न कठिन भएको छ । आहाराराको आयोजकले वर्क परमिट नभएका विदेशी खेलाडी खेलाउन नपाउने प्रावधान बनाउँदा विदेशी खेलाडीसहित पोखरा आइपुगे पनि मछिन्द्र र संकटाले विदेशी खेलाडी खेलाउन पाएनन् । त्यसको असर दुवै क्लब पहिलो चरणमै पराजित हुँदै घर फर्कन भए ।

विदेशी खेलाडी हुँदा खेल पनि रमाइलो र प्रतिस्पर्धात्मक हुने कमलले बताए । ‘विदेशी हुँदा खेल ‘टफ’ हुन्छ । विदेशी खेल्दा दर्शकलाई पनि रमाइलो हुन्छ ।’

यस पटक चर्च ब्वाइजका लागि आहारारामा सन्तोष महतले गोल पोष्ट सम्हालेका थिए । डिफेन्समा कमल र विकु राई थिए भने उनीहरुलाई सन्जित राई र गौरव श्रेष्ठले साथ दिएका थिए ।

मिडफिल्डमा प्रशान्त लक्षमलाई नेपाल सुपर लिगका राइजिङ प्लेअर रोहन कार्कीसहित नेपाल सुपर लिगमा राम्रो प्रदर्शन गरेका सन्तोष खत्रीले साथ दिएका थिए ।

नयाँ फरवार्ड लाइनमा राजिव लोप्चन कृपाकान्त चौधरी र समिर तामाङ थिए । राजिवले काठमाडौं रेजर्स र कृपाले वीरगञ्ज युनाइटेडबाट नेपाल सुपर लिग खेलेका थिए । नेपाल

यू-१९ राष्ट्रिय टिमका समेत फरवार्ड रहेका समिरले भने असोजमा काठमाडौंमा भएको साफ यू-१९ च्याम्पियनसिप खेल्दै ३ गोल गरेका थिए । उनै समिरले निर्णायक गोल गर्दै चर्च ब्वाइजलाई पुलिस विरुद्ध जित दिलाएका थिए ।

चर्च ब्वाइजका कप्तान कमल खेल जितेको भए पनि तालमेल मिलाउन कठिन भएको बताउँछन् । ‘जुनियर र सिनियर खेलाडीको मिश्रणले टिम फरक बनेको छ । त्यसैले पहिलो खेलमा तालमेल मिलाउन कठिन भयो ।’

पुलिस प्रिक्वार्टरफाइनलमा अर्को विभागीय टिम एपीएफलाई हराएर क्वार्टरफाइनलमा आएको थियो भने चर्च ब्वाइज बाई पाएर सिधै । ‘पुलिसले एक खेल खेलिसकेको थियो । हामी थोरै समय ट्रेनिङ गरेकोले पनि सुरुमा गाह्रो भयो,’ कमलले भने, ‘युवा खेलाडीहरु भएकोले उनीहरुमा अनुभवको कमी थियो र त्यसले गर्दा स्कोरिङमा कठिन भयो ।’

पहिलो हाफमा खेल गोलरहित बराबरीमा सकिएको थियो । दोस्रो हाफमा चर्च ब्वाइजले सुरुदेखि नै पुलिसमाथि लगातार दबाब बनाएको थियो । ७२औं मिनेटमा यू-१९ राष्ट्रिय टिमका समिर तामाङले गोल गरेका थिए । ‘दोस्रो हाफमा हामिले रणनीति परिवर्तन गरेका थियौं, त्यसमा सफल पनि भयौं, समयमा स्कोर हुँदा जित निकाल्न सक्यौं ।’