ट्रम्पसँग छलफल गर्न मोदी अमेरिका जाने

२२ माघ, काठमाडौं । भारतका प्रधानमन्त्री नरेन्द्र मोदी फेब्रुअरी २२ देखि अमेरिकाको दुई दिने भ्रमणमा जाने तयारीमा छन् ।

इकोनोमिक टाइम्सका अनुसार अमेरिकी राष्ट्रपति डोनाल्ड ट्रम्पसँग छलफल गर्न उनी अमेरिका भ्रमणको तयारीमा जुटेका हुन् ।

मोदीले आफ्नो दुई दिने पेरिस भ्रमण समाप्त गरेपछि वासिङ्टन डीसी यात्रा गर्नेछन् ।

यो भ्रमण राष्ट्रपति ट्रम्पको दोस्रो कार्यकाल सुरु भएपछिको मोदीको पहिलो द्विपक्षीय अमेरिका भ्रमण हुनेछ।

यो भ्रमण भएमा मोदी विश्वका सीमित विदेशी नेताहरू मध्ये एक हुनेछन्, जसले ट्रम्प प्रशासन दोस्रो कार्यकालमा केही साताभित्रै वासिङ्टन डीसीको द्विपक्षीय भ्रमण गर्नेछन् ।

२७ जनवरीमा दुई नेताबीच टेलिफोन वार्ता भएको थियो । टेलिफोन वार्तामा दुवै नेताले अमेरिका–भारत रणनीतिक साझेदारी र इन्डो–प्यासिफिक क्वाड साझेदारीलाई अगाडि बढाउन आफ्नो प्रतिबद्धतालाई जोड दिएका थिए ।

मोदी र ट्रम्पबीच न्यानो र मैत्रीपूर्ण सम्बन्ध छ । दुई नेताबीचको यो मैत्रीपूर्ण सम्बन्धले विभिन्न वैश्विक मुद्दाहरूमा भारत र अमेरिकाको एकजुटता देखाएको छ ।

रोयटर्सका अनुसार अमेरिकी उत्पादनहरूमा भारतको उच्च शुल्कलाई उद्धृत गर्दै ट्रम्पले विगतमा धम्की दिएको शुल्कबाट बच्न पनि भारत उत्सुक छ ।

-एजेन्सीहरूको सहयोगमा