२०८२ जेठ १२ गते १३:२८ 
News Summary
Generated by OK AI. Editorially reviewed.- एमएस धोनीले आईपीएलको आगामी सिजन खेल्ने वा नखेल्ने निर्णय गर्न अझै हतार नगरेको प्रतिक्रिया दिएका छन्।
- उनले भने, \'म खेल्दिनँ भनेर भन्न पनि चाहन्न, खेल्नेछु भनेर पक्का छैन\' र निर्णय गर्न ४-५ महिना समय छ।
- आफ्नो सन्यासको निर्णय प्रदर्शनमा निर्भर नहुने पनि उनले स्पष्ट पारे।
१२ जेठ, काठमाडौं । चेन्नई सुपर किंग्सका स्टार खेलाडी तथा यस सिजनका निमित्त कप्तान एमएस धोनीले आईपीएलको आगामी सिजन खेल्ने वा नखेल्ने भन्ने निर्णय गर्न प्रशस्त समय बाँकी भएको प्रतिक्रिया दिएका छन् ।
आइतबार टोलीको अन्तिम लिग खेलमा गुजरात टाइटन्सलाई हराएपछि धोनीले अहिलेका लागि होमटाउन राँची फर्किने र बाइक राइडको मज्जा लिने योजनामा रहेको बताएका हुन् ।
‘म खेल्दिनँ भनेर भन्न पनि चाहन्न, खेल्नेछु भनेर पनि पक्का छैन’ ४३ वर्षीय धोनीले भने, ‘अहिले निर्णय गर्न कुनै हतार छैन। मसँग ४-५ महिना समय छ, त्यसपछि सोचेर निर्णय लिन्छु।’
धोनीको उमेर आउँदो जुलाईमा ४४ वर्ष पुग्नेछ जसको मतलब अर्को सिजन सुरु हुँदा उनी ४५ वर्षको नजिक हुनेछन् । उनले भने, ‘हरेक वर्ष फिट रहन अझ बढी प्रयास गर्नु पर्छ। यो प्रोफेशनल क्रिकेट हो – केवल प्रदर्शन हेरेर खेल्ने या नखेल्ने निर्णय हुँदैन। चाहना, फिटनेस र टिमलाई चाहिएको योगदान कति दिन सक्छु भन्ने कुरा महत्त्वपूर्ण हो।’
उनले प्रदर्शनकै आधारमा सन्यास लिने कुरालाई भने नकार्दै यदि प्रदर्शनको आधारमा सन्यास लिन थालियो भने युवा खेलाडीहरूले २२-२३ वर्षमै खेल्न छाड्ने टिप्पणी गरेका थिए ।
आईपीएलको अन्त्यतिर राम्रो प्रदर्शन गरेपनि सिजनभर चेन्नईको प्रदर्शन कमजोर रह्यो। टोलीले १४ मध्ये केवल ४ खेल जितेर इतिहासमै पहिलोपटक पुछारमा रहेर सिजन टुंग्यायो। प्लेअफको दौडबाट सबैभन्दा पहिले बाहिरिने टोली पनि चेन्नई नै थियो ।
आइतबारको अन्तिम खेलमा भने चेन्नईले सिजनकै उत्कृष्ट प्रदर्शन गर्दै २३० रनको योगफल बनाएर गुजरातलाई १४७ रनमा समेट्यो। खेलपछि अहमदाबादको भीडले धोनीको सम्भावित अन्तिम खेल सम्झेर ‘धोनी, धोनी’को नारा लगाएका थिए ।
सिजनको बीचमा कप्तान ऋतुराज गायकवाड घाइते भएपछि पूर्वकप्तान रहिसकेका धोनीले कप्तानी सम्हालेका थिए।
प्रतिक्रिया 4