धेरै कमाउने २५ फिल्मलाई बोर्डले सम्मान गर्ने

News Summary

Generated by OK AI. Editorially reviewed.

चलचित्र विकास बोर्डले पछिल्लो २५ वर्षमा धेरै कमाइ गर्ने २५ फिल्मलाई सम्मान गर्ने घोषणा गरेको छ।
यसको लागि ५ करोड रुपैयाँभन्दा बढी कमाइ गरेको फिल्मका निर्माताले ७ दिनभित्र आवश्यक कागजातसहित निवेदन दिनुपर्नेछ।
आगामी असार १६ मा आयोजित समारोहमा सम्मान र रियल टाइम बक्सअफिसको औपचारिक सुरुवात हुनेछ।

काठमाडौं । चलचित्र विकास बोर्डले पछिल्लो २५ वर्षमा धेरै कमाइ गर्ने २५ फिल्मलाई सम्मान गर्ने भएको छ ।

बोर्डले आइतबार विज्ञप्ति जारी गर्दै २०५७ असार १६ देखि २०८२ साल जेठ मसान्तसम्म धेरै कमाइ गर्ने फिल्मलाई सम्मान गर्ने जनाएको हो ।

यसको लागि न्यूनतम ५ करोड रुपैयाँभन्दा धेरै कमाइ गर्ने फिल्मका निर्माताले प्रमाण खुल्ने कागजातसहित ७ दिनभित्र बोर्डमा निवेदन दिनुपर्ने जनाइएको छ ।

यसको लागि सम्बन्धित वर्षको चलचित्र निर्माण कम्पनीको लेखापरीक्षणको कागजपत्र र वितरकले निर्मातालाई भुक्तानी गरेको प्रमाण खुल्ने कागजात्र पेश गर्नुपर्ने अध्यक्ष दिनेश डीसीले बताए ।

आगामी असार १६ गते आयोजना हुने बोर्ड स्थापनाको २५ औं वार्षिकोत्सव समारोहमा सम्मान प्रदान गरिने भएको छ । उक्त दिन रियल टाइम बक्सअफिसको औपचारिक सुरुवातसहित बोर्डका सबै सेवालाई अनलाइन माध्यममा लैजाने कार्यको सुरुवात गर्ने कार्यक्रम छ ।

चलचित्र विकास बोर्डको बक्सअफिस अनुसार ४६ करोडभन्दा धेरै कमाउँदै ‘पूर्णबहादुरको सारंगी’ अहिलेसम्म सर्वाधिक कमाउने नेपाली फिल्म हो ।