जल तथा मौसम विज्ञान विभागले पनि भन्यो– रसुवामा हिमबाढी

Photo Credit : DHM

News Summary

Generated by OK AI. Editorially reviewed.

जल तथा मौसम विज्ञान विभागले असार २४ गते हिमताल विष्फोटबाट रसुवाको भोटेकोशीमा बाढी आएको प्रारम्भिक निष्कर्ष निकालेको छ।
बाढी पूर्वानुमान महाशाखाले उपग्रह तस्वीरहरूको विश्लेषण गरी ताल फुटेर पानी भोटेकोशी नदीमा मिसिएर बाढी आएको पुष्टि गरेको हो।
महाशाखाले चीनबाट थप स्थलगत प्रतिवेदन प्राप्त हुने अपेक्षा गरेको छ।

२७ असार, काठमाडौं । जल तथा मौसम विज्ञान विभागले पनि असार २४ गते बिहान रसुवामा हिमबाढी आएको प्रारम्भिक निष्कर्ष निकालेको छ ।

बाढी आएको दुई दिनपछि असार २६ गते विभागको बाढी पूर्वानुमान महाशाखाले उपग्रहबाट प्राप्त तस्वीरहरूको विश्लेषणको आधारमा हिमताल विष्फोटबाट बाढी आएको प्रारम्भिक निष्कर्ष निकालिएको जानकारी दिएको हो ।

यसअघि अन्तर्राष्ट्रिय पर्वतीय विकास केन्द्र (इसिमोड)का विज्ञहरुका आधारमा अनलाइनखबरले हिमबाढी आएको समाचार २५ असारमा प्रकाशित गरेको थियो । तर त्यतिबेला सरकारी निकायबाट आधिकारिक जानकारी आएको थिएन ।

जल तथा मौसम विज्ञान विभागको बाढी पूर्वानुमान महाशाखाले असार २६ गते विज्ञप्ति निकालेर हिमताल विष्फोट (Glacial Lake Outburst Flood–GLOF) बाट रसुवामा बाढी आएको जानकारी दिएको हो । तर असार २४ गते नै मुस्ताङमा आएको बाढीबारे भने बाढी पूर्वानुमान महाशाखा मौन छ ।

महाशाखाका अनुसार बाढी आउनुअघि अर्थात् असार २१ गते लिइएको Normalized Difference Water Index (NDWI) तस्बिरमा रसुवागढी क्षेत्रको एक हिमनदीको माथिल्लो भागमा ताल स्पष्ट देखिएको थियो । तर, बाढी आएपछिको तस्बिर (असार २४ गते बिहान १०ः४५ बजे लिइएको) मा सो ताल पूर्णरूपमा हराएको देखिन्छ ।

यस आधारमा विभागले उक्त ताल फुटेर पानी बाहिरिएको र त्यो पानी तल झरेर झोटेकोशी नदीमा मिसिएर अचानक बाढी आएको ठहर गरेको हो ।

Normalized Difference Vegetation Index (NDVI) विश्लेषणले पनि बाढी अघि-पछिको अवस्थाबीच उल्लेख्य अन्तर देखाएको छ । असार २१ र २४ मा लिइएका तस्वीरहरूको तुलना गर्दा ताल क्षेत्र घटेको स्पष्ट देखिन्छ, जसले हिमतालबाट पानी निस्किएको पुष्टि गर्ने महाशाखाले जनाएको छ ।

महाशाखाले जारी गरेको विज्ञप्तिमा लेखिएको छ, ‘उपरोक्त विवरणहरुको आधारमा जल तथा मौसम विज्ञान विभाग हिमताल विष्फोटबाटै यस बाढी सृजना भएको प्रारम्भिक निष्कर्षमा पुगेको छ ।’

यस सन्दर्भमा मित्रराष्ट्र चीनबाट थप स्थलगत प्रतिवेदन प्राप्त हुने अपेक्षा पनि महाशाखाले गरेको छ । आगामी दिनमा भूउपग्रह मार्फत् प्राप्त हुन सक्ने अन्य तस्वीरहरुले समेत थप पुष्ट्याईं दिन सक्ने भन्दै महाशाखाले आधिकारिक जानकारी पनि अपडेट गर्दै जाने जनाएको छ ।

चीनको तिब्बत हुँदै रसुवा भएर बग्ने भोटेकोशी नदीमा मंगलबार बिहान करिब ३ बजेतिर लेदोसहितको विनाशकारी बाढी आएको थियो । यो बाढीमा परी हालसम्म ११ जनाको मृत्यु र ९ जना बेपत्ता भएको राष्ट्रिय विपद्‌ जोखिम न्यूनीकरण तथा व्यवस्थापन प्राधिकरणले जनाएको छ ।

सोही बाढीले रसुवागढीमा मितेरी पुल बगाउँदा नेपाल-चीन व्यापारिक नाका बिच्छेद भएको छ भने टिमुरे भन्सार, भन्सार यार्डमा राखिएका एक सय बढी गाडीहरु, जलविद्युत् आयोजना र सडकमा क्षति पुगेको छ ।