२०८२ साउन १६ गते २०:४७ 
१६ साउन, काठमाडौं । राष्ट्रिय खेलकुद परिषद् (राखेप) का सदस्य सचिव टंकलाल घिसिङले नेपाली भलिबलको विकास र खेलाडीको क्षमता अभिवृद्धिका लागि अन्तर्राष्ट्रिय स्तरको मैत्रीपूर्ण भलिबल म्याच आयोजना गर्ने प्रस्ताव राखेका छन् ।
त्रिपुरेश्वरस्थित स्तरोन्नती गरिएको राखेपको कभर्डहलमा खेलाइएको मैत्रीपूर्ण खेलअघि कार्यक्रमलाई सम्बोधन गर्दै सदस्य सचिव घिसिङले नेपाली खेलकुदको स्तर उकास्न र खेलाडीहरूलाई अन्तर्राष्ट्रिय अनुभव प्रदान गर्न यस्ता प्रतियोगिताको आवश्यकता रहेको बताए ।
सदस्य सचिव घिसिङले विशेषगरी नेपाली महिला भलिबल टोलीलाई अन्तर्राष्ट्रिय प्रतियोगिताअघि एक्सपोजर गेमको आवश्यकता रहेकोमा जोड दिए । ‘नेपाली टोलीलाई अन्तर्राष्ट्रिय स्तरको अनुभव प्रदान गर्न र दर्शकहरूलाई नयाँ उत्साह दिन पनि यस्ता म्याचहरू आयोजना गर्नुपर्छ ।’
उनले नेपाल भलिबल संघ र प्रशिक्षकहरूलाई यसका लागि तत्काल योजना बनाउन आग्रह गरे ।
सदस्य सचिव घिसिङले खेलाडीको सामाजिक सुरक्षा, पुरस्कार र प्रोत्साहन भत्ताको व्यवस्थालाई पनि प्राथमिकतामा राखेर काम गर्ने प्रतिबद्धता व्यक्त गरे । ‘खेलाडीहरू खेलकुदको मुटु हुन्, र उनीहरूको हितमा हामीले काम गर्नुपर्छ ।’
सदस्य सचिव घिसिङले खेलकुद संरचनालाई थप प्रभावकारी बनाउन र पुराना समस्याहरू समाधान गर्न योजनाबद्ध रूपमा काम गर्ने बताए ।
उनले नेपालमा खेलकुदको विकासका लागि सबै पक्षको सहकार्य आवश्यक रहेको उल्लेख गर्दै आगामी दिनमा थप अन्तर्राष्ट्रिय प्रतियोगिताहरू आयोजना गर्ने प्रतिबद्धता जनाए ।
राखेप कभर्डहलको स्तरोन्नतीपछि शुक्रबार नेपालको महिला र पुरुष भलिबल खेलाडीको छुट्टा-छुट्टै मैत्रीपूर्ण खेल खेलाइएको थियो । यस्तै नेपाल भलिबल संघका पदाधिकारी र राखेपका कर्मचारीहरुबीच समेत मैत्रीपूर्ण खेल खेलाइएको थियो ।
प्रतिक्रिया 4