२०८२ साउन २१ गते १४:५० 
News Summary
Generated by OK AI. Editorially reviewed.- नेपालमा पहिलोपटक अन्तराष्ट्रिय पावरलिफ्टिङ प्रतियोगिता साउन ३०, ३१ र भदौ १ गते काठमाडौंको नेपाल पुलिस क्लब हलमा आयोजना हुने भएको छ ।
- प्रतियोगितामा नेपाल, भारत, अष्ट्रेलिया, श्रीलंका, पाकिस्तानसहित ६ राष्ट्रका १२० भन्दा बढी खेलाडी सहभागी हुनेछन् ।
- प्रतियोगिताको बजेट करिब ८६ लाख रुपैयाँ रहेको छ ।
२१ साउन, काठमाडौं । नेपालमा पहिलोपटक अन्तराष्ट्रिय पावरलिफ्टिङ प्रतियोगिता हुने भएको छ।
नेपाली युथ फिटनेस एण्ड केलिसथेनिक्सको आयोजनामा ‘एसियन पावरलिफ्टिङ च्याम्पियनसिप २०२५’ यही साउन ३०, ३१ र भदौ १ गते काठमाडौंको नेपाल पुलिस क्लब हलमा आयोजना हुने भएको हो ।
बुधबार आयोजित पत्रकार सम्मेलनमा आयोजकले प्रतियोगिताको सबै तयारी पूरा भएको जानकारी गराएको छ । प्रतियोगिता हिमालय क्विस्टा प्रोको मुख्य प्रायोजन, सुर्या प्लाइको सह-प्रायोजन र वर्ल्ड पावरलिफ्टिङको साझेदारीमा हुँदैछ ।
नेपाल, भारत, अष्ट्रेलिया, श्रीलंका, पाकिस्तानसहित ६ राष्ट्रका १२० भन्दा बढी खेलाडीहरू प्रतियोगितामा सहभागी हुनेछन् । प्रतियोगिता १६ तौल समूह (८ पुरुष, ८ महिला) र १२ उमेर समूह (६ पुरुष, ६ महिला) मा गरी १२८ समूहमा सञ्चालन हुनेछ।
उमेर समूहमा ४० देखि ८४ वर्ष उमेर समूह सम्म हुनेछ भने यू-१८ (जुनियर) र यू-२३ (युथ) को पनि स्पर्धा हुनेछ । प्रतियोगितामा १७ महिलासहित ४९ नेपाली खेलाडीहरू सहभागी हुनेछन् भने हालसम्म ५२ भारतीय खेालडी सहभागी हुने पक्का भएको छ ।
प्रतियोगितामा कुल ४ वटा ईभेन्टहरू छन् । पावरलिफ्ट, बेन्च प्रेस, डेडलिफ्ट र बेन्च प्रेस एण्ड डेडलिफ्ट ईभेन्टहरू हुनेछन् ।
प्रतियोगितामा पदक विजेताहरूलाई मेडल, ट्रफी र आकर्षक उपहार, साथै ५ खेलाडीलाई १० लाख रुपैयाँ बराबरको एक वर्षे बीमा पुरस्कारस्वरूप प्रदान गरिनेछ । कार्यक्रमको बजेट करिब ८६ लाख रुपैयाँ रहेको छ। प्रतियोगिता फेसबुक र युट्युबमार्फत प्रत्यक्ष प्रसारण गरिनेछ ।
आयोजक संस्थाका अध्यक्ष सुकदेव कार्कीले भने, ‘नेपालको पावरलिफ्टिङ इतिहासमा यो पहिलो पटक आयोजना हुन लागेको हो। यो इभेन्टले नेपालको पावरलिफ्टिङलाई अन्तर्राष्ट्रिय स्तरमा पहिचान दिन मद्दत गर्छ ।’
प्रतिक्रिया 4