‘मिस नेपाल’को अडिसनबाट चर्चित रोशनीले फिल्ममा डेब्यू गर्ने

साइन गरिन् ‘डल्लेले इन्ट्री मार्‍यो’

अनलाइनखबर

२०८२ असोज ७ गते १३:३७

News Summary

Generated by OK AI. Editorially reviewed.

फिल्म 'डल्लेले इन्ट्री मार्‍यो'को शीर्ष अभिनेत्रीमा रोशनी खड्का दशैंको घटस्थापनाको अवसरमा अनुबन्धित भएकी छन्।
राजु गिरीले निर्देशन गर्ने सो फिल्ममा रोशनीलाई सागर लम्साल 'बले'को जोडीको रुपमा देखाइनेछ।
फिल्मको छायांकन चितवन र काठ्माडौमा दशैंपछि सुरु हुने र यसमा रमेश बुढाथोकी, रवीन्द्र झा लगायतको अभिनय रहनेछ।

काठमाडौं । फिल्म ’डल्लेले इन्ट्री मार्‍यो’को शीर्ष अभिनेत्रीमा रोशनी खड्का अनुबन्धित भएकी छन् । राजु गिरीले निर्देशन गर्ने फिल्मले दशैंको घटस्थापनाको अवसरमा उनलाई अनुबन्धित गरेको हो ।

निर्देशनमा बन्ने फिल्म टिमले रोशनीलाई घटस्थापनाको दिन पारेर सोमबार अनुबन्ध गरेको हो ।

मिस नेपाल २०२५ को अडिसनका क्रममा कोरियोग्राफर रचना गुरुङ शर्माले उनको हातको पृष्ठभूमिबारे प्रश्न सोधेपछि रोशनी एकाएक चर्चामा आएकी थिइन् ।

त्यतिबेला उक्त घटनालाई लिएर सामाजिक सञ्जाल नै विभाजित बनेको थियो । त्यतिबेला रोेशनीले जन्मजातदेखि नै आफ्नो हातमा समस्या रहेको बताएकी थिइन् ।

यो फिल्ममा उनलाई सागर लम्साल ‘बले’को जोडीको रुपमा देख्न पाइने भएको छ । लक्ष्मण सुवेदीको पटकथा हुने फिल्ममा रमेश बुढाथोकी, रवीन्द्र झा, ध्रुव कोइराला, सुभाष गजुरेललगायतकाको अभिनय हुनेछ ।

श्याम तामाङको छायांकन, देव महर्जनको द्वन्द्व निर्देशन, अर्जुन पोखरेल, बाबुल गिरी र रिमेशकुमार थापाको संगीत हुनेछ ।

चितवन र काठ्माडौमा छायांकन हुने फिल्म सोसल कमेडी जनरामा निर्माण हुने जनाइएको छ । दशैं लगत्तै छायांकन सुरु हुने जनाइएको छ ।