विपिनका दाजु भन्छन् : हमासले छोड्नुपर्ने अझै छन्, भाइ फर्किन्छ भन्ने आशा मार्न सकिन्न

News Summary

Generated by OK AI. Editorially reviewed.

हमासको आक्रमणपछि इजरायलबाट बेपत्ता भएका विपिन जोशी जीवित नरहेको सूचना इजरायलस्थित नेपाली राजदूतावास र परिवारलाई दिइएको छ।
इजरायली सेना आईडीएफका अधिकारीले विपिन जोशी जीवित नरहेको जानकारी नेपाली राजदूत धनप्रसाद पण्डित र परिवारलाई भिडियो कन्फरेन्समा दिएका छन्।
विपिनका दाजु किशोर जोशीले हमासले अझै बन्धकहरु छोड्न बाँकी रहेकाले आशा मारेको छैनन् र भाइ फर्कने विश्वास राखेका छन्।

२७ असोज, काठमाडौं। हमासको आक्रमणपछि इजरायलबाट बेपत्ता भएका विपिन जोशी जीवित नरहेको सूचना आए पनि परिवारले अझै आशा मारेको छैन ।

हमासले बन्धकहरु छोड्न अझै पनि बाँकी रहेकाले अहिले नै आश मार्न नसकिने उनका दाजु किशोर जोशीले बताए ।

‘युद्धविराम क्रममा आज बन्धकहरु रिहा भइरहेका छन् । बिहान इजरायलसँग पनि कुरा भयो हमासले आधिकारिक रुपमा छोड्नेमा अझै मान्छेहरु बाँकी छन्,’ दाजु किशोरले कञ्चनपुरस्थित निवासमा भने, ‘त्यसैले हामीलाई अझै आशा बाँकी छ । भाइ आउँछ भन्ने आशा छ । निराश हुनुपर्ने ठाउँ छैन ।’

इजरायली सेना आईडीएफका एक अधिकारीले इजरायलको स्थानीय समय अनुसार आज बिहान साढे ७ बजे विपिन जीवित नरहेको औपचारिक जानकारी इजरायलस्थित नेपाली राजदूतावास र विपिनको परिवारका सदस्यहरुलाई दिएका छन् ।

इजरायली अधिकारीले इजरायलका लागि नेपाली राजदूत धनप्रसाद पण्डित, अमेरिकामा रहेकी विपिनकी बहिनी, नेपालमा रहेका विपिनका दाजु किशोर र इजरायलको प्रधानमन्त्री कार्यालयका दुई अधिकारीहरुलाई भिडियो कन्फरेन्समा जोडेर विपिन जीवित नरहेको औपचारिक जानकारी दिएको राजदूत पण्डितले अनलाइनखबरलाई जानकारी दिए ।

विपिन जीवित नरहेको भनिए थप विवरण प्राप्त हुन सकेको छैन ।