बन्चरेडाँडामा अब रात्रिकालीन फोहोर व्यवस्थापन, राख्न थालियो बत्ती

News Summary

Generated by OK AI. Editorially reviewed.

नेपाल विद्युत् प्राधिकरण नुवाकोट वितरण केन्द्रले बन्चरेडाँडा ल्यान्डफिल साइटमा रात्रिकालीन फोहोर व्यवस्थापनका लागि बत्ती जडान सुरु गरेको छ।
ऊर्जा मन्त्री कुलमान घिसिङले ल्यान्डफिल साइट अनुगमनपछि रात्रिकालीन फोहोर व्यवस्थापनका लागि तुरुन्तै बत्ती जडान गर्ने प्रतिबद्धता जनाएका थिए।
सहरी विकास मन्त्रालयले नियमित अनुगमनका लागि काठमाडौं महानगरपालिका, धुनिबेँसी नगरपालिका, ककनी गाउँपालिका र स्थानीयको प्रतिनिधित्वमा समिति गठन गरेको छ।

१७ कात्तिक, काठमाडौं । बन्चरेडाँडा ल्यान्डफिल साइटमा रात्रिकालीन फोहोर व्यवस्थापनका लागि बत्ती जडान सुरु भएको छ ।

नेपाल विद्युत् प्राधिकरण नुवाकोट वितरण केन्द्रले सोमबार ल्यान्डफिल साइटमा बत्ती जडानका लागि पोल झारेको छ । अब पोल गाडेर बत्ती जडान गरिने छ ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले आइतबार ल्यानडफिल साइट अनुगमन र स्थानीयसँगको अन्तर्क्रिया क्रममा रात्रिकालीन फोहोर व्यवस्थापनका लागि तुरुन्तै बत्ती जडान सुरु गर्ने प्रतिबद्धता जनाएका थिए ।

त्यसपछि प्राधिकरणका कार्यकारी निर्देशक मनोज सिलवाल र नुवाकोट वितरण केन्द्र प्रमुखलाई बत्ती जडानका लागि आवश्यक व्यवस्था गर्न निर्देशन दिएका थिए ।

यसैगरी फोहोरबाट निस्कने लिच्चड व्यवस्थापनका लागि जडान गर्न पम्प साइटमा आपूर्ति गरिसकिएको छ । स्थानीयसँग जनाइएको प्रतिबद्धता बमोजिम नियमित अनुगमन गर्न सहरी विकास मन्त्रालयका सिनियर डिभिजनल इन्जिनियरको संयोजकत्वमा काठमाडौं महानगरपालिका, धुनिबेँसी नगरपालिका, ककनी गाउँपालिका र प्रत्यक्ष प्रभावित स्थानीयको प्रतिनिधित्व रहने गरी समिति गठन गरिएको छ ।