मधेशमा नयाँ सरकार गठनको आह्वान

News Summary

Generated by OK AI. Editorially reviewed.

प्रदेश प्रमुख सुरेन्द्र लाभ कर्णले मधेश प्रदेशमा नयाँ सरकार गठनका लागि बहुमत प्राप्त सदस्यले दाबी पेश गर्न आह्वान गर्नुभएको छ।
नेकपा एमाले संसदीय दलका नेता सरोजकुमार यादव नेतृत्वको सरकारले २२ दिनमै राजीनामा दिएको छ।
सर्वोच्च अदालतको आदेशपछि विश्वासको मत नपाउने निश्चित भएपछि यादवले राजीनामा घोषणा गर्नुभएको हो।

१७ मंसिर, जनकपुरधाम । मधेश प्रदेशमा नयाँ सरकार गठनका लागि आह्वान भएको छ ।

प्रदेश प्रमुख सुरेन्द्र लाभ कर्णले संविधानको धारा १६८ को उपधारा २ बमोजिम दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेश सभा सदस्यलाई दाबी पेश गर्न आह्वान गरेका छन् ।

आगामी शुक्रबार साँझ ५ बजेसम्म दाबी पेश गर्न समय सीमा तोकिएको छ । संविधानको धारा १६८ को उपधारा ३ बमोजिम ठूलो दलको हैसियतमा गठन भएको नेकपा एमाले संसदीय दलको नेता सरोजकुमार यादव नेतृत्वको सरकारले राजीनामा दिएपछि नयाँ सरकार गठनको लागि आह्वान गरिएको हो ।

गत २४ कात्तिकमा बर्दिबासको पानस होटेलमा शपथ लिएर मुख्यमन्त्री बनेका यादवले २२ दिनमै राजीनामा दिएका हुन् । सर्वोच्च अदालतले २४ घण्टा भित्र विश्वासको मत लिनु भन्ने सर्वोच्च अदालतको परमादेशपश्चात डाकिएको प्रदेश सभा बैठकमा विश्वासको मत नपाउने निश्चित भएपछि यादवले बुधबार राजीनामा घोषणा गरेका हुन् ।