हाच्छिउँ आउन खोज्दा जबरजस्ती रोक्नु हुन सक्छ खतरनाक

कहिलेकाहीँ कुनै मिटिङ, कक्षाकोठा वा कुनै विशेष अवसरमा सहभागी भइरहेका बेला अचानक नाम सकसक हुन थाल्छ । कडा हाच्छिउँ आउन खोजिरहेको हुन्छ ।

यस्तो समयमा, धेरै मानिसहरू असभ्य भइने डरले वा संकोच मानेर आइरहेको हाच्छिउँ जबरजस्ती रोक्न खोज्छन् ।

तर के तपाईंलाई थाहा छ यो कति खतरनाक हुन सक्छ ?

हाच्छिउँ हाम्रो शरीरमा एक प्राकृतिक सुरक्षात्मक संयन्त्र हो । जब धुलो, परागकण, तीव्र गन्ध, वा भाइरस नाकमा प्रवेश गर्छन्, शरीरले तिनीहरूलाई बाहिर निकाल्न हाच्छिउँ गरेर प्रतिक्रिया दिन्छ । यो एक प्रकारको सुरक्षा अलार्म हो, जसले फोक्सो र श्वासप्रश्वास नलीलाई सफा राख्न मद्दत गर्दछ । चिसो वा एलर्जीको समस्या हुँदा हाच्छिउँ आउनु समान्य हुन्छ ।

त्यसैले, यसलाई दबाउनु वा रोक्नु उपयुक्त हुँदैन । हाच्छिउँ आउनु कुनै लज्जाको विषय होइन, यो शरीर सफाइको एक प्रक्रिया हो ।

जबरजस्ती हाच्छिउँ रोक्दा के हुन्छ त ?

जब हामी नाक र मुख बन्द गरेर हाच्छिउँ रोक्न खोज्छौं, यसले अचानक शरीरभित्र दबाब बढाउँछ । यो दबाबले कान, घाँटी र मस्तिष्कमा पनि असर गर्न सक्छ ।

हाच्छिउँ रोक्दा कानको जाली फुटेको वा घाँटीका नसाहरूमा चोट लागेको घटनाहरू समेत चिकित्सा रिपोर्टहरूले देखाएका छन् । यसबाहेक, अत्यधिक दबाबले गम्भीर टाउको दुख्ने, चक्कर लाग्ने वा घाँटी सुन्निने समस्या निम्त्याउन सक्छ ।

रक्तनलीहरूमा बढ्दो दबाबले गम्भीर जटिलताहरू निम्त्याउने दुर्लभ घटनाहरू समेत हुन्छ । यसबाहेक, यसले मस्तिष्कलाई असर गर्न सक्छ, सम्भावित रूपमा मृत्यु पनि निम्त्याउन सक्छ। त्यसकारण, विज्ञहरूले हाच्छिउँलाई आउन दिन र जबरजस्ती नरोक्न सुझाव दिन्छन् ।

यदि कुनै अप्ठ्यारो परिस्थितिमा हाच्छिउँ आउन खोजेको महसुस हुन्छ भने, यसलाई रोक्न प्रयास गर्नुको सट्टा,राम्ररी छोड्ने प्रयास गर्नु राम्रो हुने विज्ञहरूको भनाइ छ ।

हाच्छिउँ गर्दा नजिकै भएका अरूलाई संक्रमण फैलिनबाट रोक्नका लागि आफ्नो मुख र नाकलाई रुमाल वा टिस्युले हल्का रूपमा छोप्नुपर्छ ।

यदि टिस्यु उपलब्ध छैन भने, आफ्नो कुहिनाको भित्री भागमा हाच्छिउँ गर्नुपर्छ। हाच्छिउँ गरेपछिहात साबुनले राम्ररी धुनुपर्छ ।