२०८३ भदौ ३ गते १७:२२ 
News Summary
Generated by OK AI. Editorially reviewed.- सुदूरपश्चिम रोयल्सले नेस स्पोर्ट ग्लोबललाई नेपाल प्रिमियर लिगको आफ्नो रणनीतिक साझेदार घोषणा गरेको छ।
- दुवै पक्षले नेपाली क्रिकेटको विकास र अन्तर्राष्ट्रिय स्तरमा यसको सम्भावना बढाउने उद्देश्यसहित साझेदारी गरेको बताएका छन्।
- नेस स्पोर्ट ग्लोबलका संस्थापक निसान्त अल्भारेस र सुदूरपश्चिम रोयल्सका सीईओ प्रकाश खड्काबीच सम्झौतापत्रमा हस्ताक्षर भएको छ।
३ भदौ, काठमाडौं । नेपाल प्रिमियर लिग (एनपीएल) को फ्रेन्चाइज टोली सुदूरपश्चिम रोयल्सले नेस स्पोर्ट ग्लोबललाई आफ्नो रणनीतिक साझेदारका रूपमा घोषणा गरेको छ ।
नेपाल क्रिकेटको विकास र अन्तर्राष्ट्रिय स्तरमा नेपाली क्रिकेटको सम्भावनालाई थप उचाइमा पुर्याउने उद्देश्यसहित सुदूरपश्चिम रोयल्स र नेस स्पोर्ट ग्लोबलबीच रणनीतिक साझेदारी भएको हो ।
नेस स्पोर्ट ग्लोबलका संस्थापक तथा प्रमुख कार्यकारी अधिकृत निसान्त अल्भारेस र सुदूरपश्चिम रोयल्सका सीईओ प्रकाश खड्काबीच सम्झौतापत्रमा हस्ताक्षर भयो ।
सीईओ अल्भारेसले नेपाल क्रिकेटका लागि महत्वपूर्ण समयमा सुदूरपश्चिम रोयल्ससँग सहकार्य गर्न पाउँदा आफूहरू उत्साहित रहेको बताए ।
‘नेपाल क्रिकेट राष्ट्रका रूपमा अघि बढिरहेको र यसको सम्भावना निकै ठूलो रहेकोमा हामी पूर्ण विश्वस्त छौं । सुदूरपश्चिम रोयल्सका प्रमुख कार्यकारी अधिकृत प्रकाश खड्काको नेतृत्वमा बलियो र सफल फ्रेन्चाइज निर्माण गर्ने दृष्टिकोणसँग सहकार्य गर्न पाउँदा हामी खुसी छौं’ अल्भारेसले भने, ‘यो साझेदारीलाई सम्भव बनाउन महत्वपूर्ण भूमिका निर्वाह गर्नुभएका नेस स्पोर्ट ग्लोबलका नेपाल प्रमुख सञ्चालन अधिकृत राजीव तिवारीप्रति पनि आभार व्यक्त गर्दछौं । नेपाल क्रिकेटको विकासमा योगदान पुर्याउँदै सुदूरपश्चिम रोयल्सलाई नेपालसँगै विश्वस्तरमा अझ उचाइमा पुर्याउन हामी उत्साहित छौं ।’
सुदूरपश्चिम रोयल्सका प्रमुख कार्यकारी अधिकृत प्रकाश खड्काले नेस स्पोर्ट ग्लोबलसँगको साझेदारीले टोलीलाई थप रणनीतिक रूपमा अघि बढ्न सहयोग पुग्ने विश्वास व्यक्त गरे ।
‘नेस स्पोर्ट ग्लोबलसँगको यो साझेदारीलाई हामीले निकै सकारात्मक र महत्वपूर्ण रूपमा लिएका छौं । तेस्रो संस्करणको एनपीएलमा प्रवेश गर्दा टोलीलाई मैदानभित्र मात्र नभइ व्यावसायिक र रणनीतिक रूपमा पनि अझ बलियो बनाउने हाम्रो लक्ष्य छ । नेस स्पोर्ट ग्लोबलबाट तेस्रो संस्करणमा रणनीतिक रूपमा उत्कृष्ट साथ र सहकार्य रहनेमा हामी विश्वस्त छौं’ खड्काले भने, ‘यस साझेदारीले सुदूरपश्चिम रोयल्सको ब्रान्डलाई थप विस्तार गर्नुका साथै नेपाली क्रिकेटको विकास र अन्तर्राष्ट्रिय पहुँच बढाउन पनि महत्वपूर्ण भूमिका खेल्ने विश्वास लिएका छौं ।’
प्रतिक्रिया 4