सक्कली र नक्कली प्रधानमन्त्री जम्काभेट हुँदा !

२५ कात्तिक, काठमाडौं । सिस्नुपानी नेपालले बिहीबार देखाएको देउसीका मुख्य आकर्षण बने ‘केपी ओली’ । तर, प्रधानमन्त्री केपी ओली होइन, उनका डुब्लिकेट अर्का ओली ।

त्यसो त प्रधानमन्त्री केपी ओली खुद प्रज्ञाभवनमा आयोजित देउसी कार्यक्रममा उपस्थित थिए । आफ्नो क्याबिनेटका सातजना मन्त्रीहरुका साथमा उनी नाकाबन्दीको तनाब भुलेर डेढ घण्टा गाईजात्रे शैलीको देउसी कार्यक्रममा रमाए । नक्कली प्रधानमन्त्रीले स्टेजमा देउसी खेलिरहँदा सक्कली प्रधानमन्त्री दर्शकदीर्घामा बसेर मसुमुसु हाँसिरहेका थिए । नक्कली प्रधानमन्त्रीको देउसी यस्तो थियो :

हा है माननीय महिला  — देउसिरे

माननीय पुरुष  — देउसिरे

सत्ता पक्ष     — देउसिरे

प्रतिपक्ष     — देउसिरे

दक्षिणको साटो — देउसिरे

उत्तरको बाटो   — देउसिरे

लड्दै पड्दै    — देउसिरे

धराप थाप्दै   — देउसिरे

छिर्के लाउँदै   — देउसिरे

झटारो फाल्दै  — देउसिरे

उखान हाल्दै   — देउसिरे

यहाँसम्म आएँ — देउसिरे

माला लाएँ    — देउसिरे

कुर्सीको झट्टी — देउसिरे

हान्नेलाई पनि — देउसिरे

मन्त्री बनाएँ   — देउसिरे

माइकको झटारो      — देउसिरे

समातेर       — देउसिरे

उतै फर्काएँ    — देउसिरे

प्रचण्डलाई     — देउसिरे

बनमारा भन्थेँ — देउसिरे

बनमाराकै     — देउसिरे

बुटी लाएँ     — देउसिरे

माओवादीलाई  — देउसिरे

बेलुन भन्थेँ    — देउसिरे

बेलुनमै चढी   — देउसिरे

आकासमा उडेँ     — देउसिरे

भनभन साथी हो     — देउसिरे

राम्ररी भन    — देउसिरे

कुर्सी र भाँच्ने — देउसिरे

माइकै फ्याँक्ने — देउसिरे

नगरौँ अब     — देउसिरे

एकआपसमा   — देउसिरे

नलरौँ अब    — देउसिरे

संसदमा घुर्ने   — देउसिरे

दूतावास कुर्ने  — देउसिरे

नगरौँ अब     — देउसिरे

बद्नामीमा    — देउसिरे

नपरौँ अब     — देउसिरे

देशको माटो   — देउसिरे

छोएर भन्छु   — देउसिरे

तराई पहाड हिमाल    — देउसी रे

जय जय नेपाल — देउसी रे ।

नक्कली ओलीले देउसी खेलेपछि प्रधानमन्त्री ओलीलाई मन्तव्यका लागि मञ्चमा बोलाइयो । माइकमा उभिएर बोल्नुअघि प्रधानमन्त्रीले आफ्ना डुब्लिकेटलाई निकैबेर घुरेर हेरे । सायद मनमनै भने होलान्, ‘अरु त ठीकै हो, जुँगा मिलेन ।’

कलाकारिताका पारखी प्रधानमन्त्री ओली आफूमाथि प्रस्तुत हुने व्यंग्य सहजै पचाइदिन्छन् । उनले भाषण गर्ने क्रममा भने, ‘धुर्मुसले आज पनि मेरो हुर्मत लिएर छोडे ।’

प्रधानमन्त्री ओलीकी पत्नी राधिका शाक्यलाई एक सहभागीले सोधे, ‘उमेरमा प्रधानमन्त्री पनि यस्तै (ठट्यौलो) हुनुहुन्थ्यो होला है !’ राधिका बेस्सरी हाँसिन् । ‘उमेरमा होइन, अहिले पनि ठट्यौलो नै हुनुहुन्छ’ भनिनन् । बरु उनले नक्कली ओलीको जुँगामाथि प्रश्न उठाइन् । उनले ‘जुँगा त ठ्याम्मै मिलेन है’ भन्दा हाँस्ने पालो अरुको थियो ।

बालकोटमा धुर्मुसको आउजाउ

नक्कली केपी ओलीका रुपमा प्रस्तुत भएका थिए, उही चिरपरिचित हास्यकलाकार सीताराम कट्टेल ‘धुर्मुस’ । हास्यश्रृंखला मेरीबास्सैमा नक्कली केपी ओलीको भेषमा देखिँदै आएका उनी व्यक्तिगतरुपमा समेत ओलीसित निकट छन् ।

सिस्नुपानी नेपालले अन्तिम समयमा मात्रै देउसी कार्यक्रममा ओलीको भेषमा प्रस्तुत हुन धुर्मुसलाई अफर गरेको थियो । धुर्मुसले नस्वीकार्ने कुरै थिएन । देउसीका शब्दहरु सिस्नुपानीकै लेखकहरुले तयार गरेका थिए भने स्टेजमा उत्रिँदा धुर्मुसले आफ्नो शैलीमा फूलबुट्टा भरेर त्यसलाई अझै रोचक बनाए । देउसीकै बीचमा उनले आफ्नो गार्ड बनेर उभिएका पात्रलाई पटकपटक स्यालुट हान्न लगाउँदा दर्शकमा हाँसोको फोहोरा छुटेको थियो ।

‘केपी ओलीको भेष धारण गरिसकेपछि म आफूलाई उहाँ नै सम्झिन्छु,’ धुर्मुस भन्छन्, ‘उहाँलाई व्यक्तिगत रुपमा पनि नजिकबाट चिनेकाले क्यारिकेचर उतार्न मलाई सजिलो हुन्छ ।’

केहि दिनअघि मात्रै सुमेरु गु्रपको १५ औं वाषिर्क साधारणसभामा धुर्मुस प्रधानमन्त्री ओलीको भेषमा प्रकट भएका थिए । नक्कली गाडसहित कार्यक्रममा जाँदा केहि सहभागीहरु साँच्चिकै प्रधानमन्त्री भनेर झुक्किए । उनीहरुमध्ये कसैले नाकाबन्दी खुलाउन आग्रह गरेको र कसैले यति धेरै उपप्रधानमन्त्री किन बनाएको भनेर आफूलाई प्रश्न गरेको धुर्मुस बताउँछन् । यस्ता घटनाहरु बारम्बार हुने गरेका छन् ।

प्रधानमन्त्री ओलीको गृहजिल्ला झापाकै वासिन्दा हुन् धुर्मुस । पहिले आक्कल झुक्कल भेट भए पनि ओलीको गेटअपमा प्रस्तुत हुन थालेदेखि निकटता बढेको धुर्मुस बताउँछन् । धुर्मुसका श्रीमान-श्रीमती ओलीलाई ‘बा’ भनेर सम्वोधन गर्छन् ।

धुर्मुसले पहिलोपटक सम्धीज्यू भन्ने सिरियलमा ओलीको नक्कल उतारेका थिए । त्यसको केही दिनपछि आयोजित गाईजात्रामा उनी ओलीकै अवतारमा प्रस्तुत भए । उक्त गाईजात्रालाई अत्यधीक रुचाइएपछि ओलीको चरित्रलाई धुर्मुसले मेरीबास्सैमा उतारेका हुन् ।

मेरीबास्सैको चरित्र चर्चित बन्दै गएपछि ओलीको आँखामा परेका थिए धुर्मुस । ओलीले एक दिन धुर्मुसका बुढाबुढीलाई घरमै डाके । उनको कलाकारिताको खुलेर प्रशंसा गरे । धुर्मुसपछि मख्ख परे । त्यसयता उनको बालकोट आउजाउ बाक्लै हुने गरेको छ । दशैंमा टीका लगाउनदेखि जन्मदिनमा शुभकामना दिनसम्म उनीहरु ओलीनिवास पुग्छन् ।

ओलीलाई पहिलेदेखि नै कलाप्रेमी नेताको रुपमा आफुले पाएको धुर्मुस बताउँछन् । ‘नेपाली कला र संगीतप्रति उहाँको ठूलो मोह छ,’ धुर्मुसले भने, ‘हामी जाँदा कहिलेकाहीँ आफैं हार्मोनियम बजाएर नारायणगोपालका गीत गाइरहेको देख्थ्यौं ।’

कलाकारिताप्रतिको मोहका कारण नै प्रधानमन्त्रीले जस्तोसुकै व्यस्तताका बावजुद कलाकारहरुले बोलाएको कार्यक्रममा समय निकाल्ने गरेको उनको भनाइ छ ।