‘पुरानो बुलेट’मा अनुपको भिन्न लुक्स

पत्रकार भीषण राईद्वारा निर्देशित चलचित्र ‘पुरानो बुलेट’मा नायक अनुप विक्रम शाही ‘एक्स्ट्रा लुक्स’मा आउँदैछन् । चलचित्रमा उनी गाउँको एक ‘पोजे’ युवा हुन्छन् । उनले गेटअप कानमा ठूलो कुन्डल, लामो कपाल, हातमा पन्जा, बेगी पेन्ट र डिङ्गो बुट हुन्छ भने साथमा पुरानो बुलेट । क्रेजी इन्टरटेनमेन्ट प्रा.लि.को व्यानरमा बनेको चलचित्र ‘पुरानो बुलेट’ चैत्र १ गतेदेखि प्रदर्शनमा आउँदैछ ।

एक्स्ट्रा लुक्सकै कारण यस चलचित्रले दर्शकको माया पाउनेमा नायक अनुप विक्रम शाही ढुक्क छन् । उनी भन्छन्–‘मैले यस चलचित्रमा आफूले जिवन्त अभिनय गर्न सकेको छु । र, यस चलचित्रमा मेरो गेटअपकै कारण मैले सम्पूर्ण दर्शकहरुको माया पाउने आशा राखेको छु ।’

चलचित्रमा अनुपका अलवा वर्षा शिवाकोटी, माला लिम्बु, शिव मुखिया, कृष्णभक्त महर्जन, कविता आले, शिरोमणि दवाडी लगायतको अभिनय रहेको छ । निर्देशक भीषण र कार्यकारी निर्माता सन्तोष राईको कथा रहेको यस चलचित्रलाई अशोक कुमार राई, विरेन साम्बा, टिकाराम राई र दिपेन लिम्बुले संयुक्त रुमा निर्माण गरेका हुन् ।