महिला टी–२० लिगको मिति परिवर्तन, खेल त्रिवि मैदानमा

१७ वैशाख, काठमाडौं । महिला टी–२० लिग क्रिकेटको मिति र स्थल परिवर्तन भएको छ ।

एनसीएल स्पोर्ट्स प्रालिले प्रेस विज्ञप्ति जारी गर्दै प्रतियोगिता यही जेठ २४ देखि ३० गतेसम्म टियु क्रिकेट मैदानमा हुने जानकारी दिएको छ ।

पटक पटक सारिएको प्रतियोगिता यसअघि जेठ ६ देखि १३ गतेसम्म आयोजना गर्ने निर्णय गरेको थियो । विराटनगरमा हुने भनिएको महिला क्रिकेट लिग काठमाडौंमा सारिएको हो । राष्ट्रिय खेलकुद परिषद् (राखेप) कै समन्वयनमा प्रतियोगिता सारेको आयोजकले जानकारी दिएको छ ।

पछिल्लो मिति घोषणा गरेपनि प्रधानमन्त्री कप क्रिकेटसँग मिति जुधेपछि प्रतियोगिता सारिएको आयोजकले जानकारी दिएको छ । प्रतियोगिताका मार्की खेलाडीदेखि टिमले अक्सनबाट खेलाडीसमेत अनुबन्धित गरिसकेका छन् ।

प्रतियोगितामा विराटनगर रोअरिङ लायोनेस, भैरहवा क्विन्स, धनगढी वन्डर वोमेन, र काठमाडौ सुपर च्याम्पियन्स रहेका छन् ।