सेयर बजारमा गिरावट, विश्लेषक भन्छन् : आत्तिनुपर्दैन

१८ माघ, काठमाडौं । साताको पहिलाे दिन आइतबार सेयर बजार परिसूचक घटेको छ । आइतबार विहान कारोबार खुलेसँगै घट्न शुरु भएको बजार नेप्से परिसूचक ५४.७५ अंकले  घटेर २ हजार ३ सय ७० दशमलव ५४ मा झरेको छ ।

‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स ९.७३ अंकले घटेको छ भने नेप्सेमा कारोबार हुने सबैजसो सूचकमा गिरावट आएको छ ।

सबैभन्दा धेरै फाइनान्स समूह ४ प्रतिशत भन्दा धेरैले घटेको छ भने बैंकिङ र बिमा समूह पनि २ प्रतिशत भन्दा धेरैले घटेको छ । सबै सबइन्डेक्सनहरु घटे पनि प्रभु लाइफलगायतका कम्पनीहरुको सेयर मूल्य भने वृद्धि भएको छ ।

आइतबार दिनभर भएका ९६ हजार १ सय ५६ कारोबारबाट १ करोड ६२ लाख ७७ हजार २ सय ४५ कित्ता सेयर किनबेच भएका छन् । जसबाट ८ अर्ब ९७ करोड ३२ लाख ६ हजार ४ सय ५० रुपैयाँको कारोबार भएको छ ।

बजार घट्दा यी कम्पनीले कमाए

बजारमा ५४ अंक भन्दा धेरैको गिरावट आउँदा केही कम्पनीहरुको सेयर मूल्य भने वृद्धि भएको छ । सबैभन्दा धेरै प्रभु लाइफ इन्स्यारेन्स कम्पनीको सेयर मूल्य ९.९३ प्रतिशतले वृद्धि भएको छ ।

एभरेष्ट इन्स्यारेन्सको संस्थापक सेयर मूल्य पनि ९ प्रतिशत भन्दा धेरैले वृद्धि भएको छ ।

यी कम्पनीले धेरै गुमाए

आइतबार सबैभन्दा धेरै गुमाउनेमा रिलायन्स फाइनान्स कम्पनीका लगानीकर्ताहरु देखिएका छन् । रिलायन्स फाइनान्सको ८.३० प्रतिशत अर्थात २१ रुपैयाँले सेयर मूल्य घटेर २ सय ३२ रुपैयाँमा झरेको छ ।

धेरै गुमाउने दोस्रोमा भने गोर्खाज फाइनान्सका लगानीकर्ता देखिए । गोर्खाजको सेयर मूल्य ७.८३ प्रतिशत अर्थात ३६ रुपैयाँले घटेर ४२४ रुपैयाँमा झरेको छ ।

‘आत्तिनु पर्ने अवस्था छैन, बजार सुधार हुन्छ’

सेयर बजारका विश्लेषक विष्णु बस्यालले भने अहिले आत्तिनुपर्ने अवस्था नरहेको बताएका छन् । उनले आज बजारलाई करेक्सनको रुपमा मात्रै बुझ्नुपर्ने बताए । बजार लगातार बढ्यो र कुनै एक दिन घट्यो भने त्यसलाई करेक्सन भन्ने चलन छ ।

विश्लेषक बस्यालले पनि आइतबार बजार सामान्य करेक्सन भएको बताए । आइतबार बजार घट्नुको कुनै त्यस्तो खास कारण नरहेको बताएका उनले भोलि नै पनि सुधार हुन सक्ने बताए ।

‘बजार लगातार बढिरहेको थियो, करेक्सन हुने बेला नै हो’ उनले भने, ‘भोलि नै पनि बढ्ने सम्भावना छ, नभए पनि केही दिन करेक्सन भएर बजार बढ्छ नै ।’