नेपाल आउने पर्यटकको प्रमुख उद्देश्य मनोरञ्जन र भ्रमण

२७ असार, काठमाडौं । नेपाल भित्रिने अधिकांश पर्यटकहरु मनोरञ्जन, यात्रा तथा भ्रमणका लागि आउने गरेका छन् । अर्थमन्त्रालयले बिहीबार सार्वजनिक गरेको आर्थिक सर्वेक्षणअनुसार २०६९ पुसदेखि २०७० पुससम्मको अवधिमा नेपाल आएका कुल पर्यटकमध्ये ५४.९ प्रतिशत पर्यटकको उद्देश्य मनोरञ्जन तथा भ्रमण गर्नु रहेको छ ।

यस अवधिमा ७ लाख ९७ हजार ७ सय ५९ पर्यटक नेपाल भित्रिएका थिए । जसमध्ये पदयात्रा तथा पर्वतारोहणका लागि १२.२ प्रतिशत, तीर्थयात्राका लागि ५.१ प्रतिशत, प्रशासकीयतर्फ ५ प्रतिशत, व्यापारको शिलशिलामा ३.८ प्रतिशत, सभा तथा सम्मेलनका लागि २ प्रतिशत, साहासिक जलयात्राका लागि ०.२ प्रतिशत र १४.८ प्रतिशत अन्य उद्देश्यले नेपाल भित्रिएका छन् ।

सबैभन्दा बढी भारतीय

नेपालमा सबैभन्दा बढी पर्यटक भारतबाट आउने गरेका छन् । समिक्षा अवधिमा नेपाल भित्रिएका कुल पर्यटकमध्ये भारतबाट २३ प्रतिशत, चीनबाट ११.२ प्रतिशत, श्रीलंकाबाट ७.५ प्रतिशत, अमेरिकाबाट ७.३ प्रतिशत, यूकेबाट ४.७ प्रतिशत रहेका छन् । विगत १० वर्षदेखिको तथ्यांक हेर्दा पर्यटकीय भ्रमणका दृष्टिले यी ५ देशहरु प्रमुख रहँदै आएका छन् ।

आर्थिक वर्ष २०६९/०७० मा ३४ अर्ब २१ करोड १० लाख रुपैयाँ विदेशी मुद्रा आर्जन भएको छ । जुन रकम अघिल्लो वर्षको तुलनामा ११ प्रतिशत अर्थात ३ अर्ब ५० करोड ७० लाख रुपैयाँले बढी हो । चालु आर्थिक वर्षको प्रथम आठ महिनामा पर्यटन क्षेत्रबाट ३० अर्ब ४३ करोड रुपैयाँ रहेको छ । विदेशी मुद्राको आर्जन यहि रफ्तारमा भए चालु आर्थिक वर्षको अन्त्यसम्ममा ४५ अर्ब ४६ करोड रुपैयाँ पुग्ने सरकारी प्रक्षेपण छ ।

प्रतिदिन ३४ हजार पर्यटकलाई सेवा

पर्यटन उद्योगमा २०७० पुस मसान्तसम्म दर्ता भएका पर्यटकस्तरीय होटलको संख्या १ हजार २६ पुगेका छन् । जुन होटलले एक दिनमा ३४ हजार ५ सय २३ पर्यटकलाई सेवा पुर्‍याउन सक्छन् ।

यस अवधिसम्म पर्यटन उद्योगमा १ सय १७ वटा तारे स्तरकार होटलहरु दर्ता भएका छन् । जहाँ ९ हजार ५ सय ५ पर्यटकलाई सेवा दिन सकिन्छ । तारे बाहेकका पर्यटक स्तरीय होटलको संख्या पुस मसान्तसम्म ९ सय ९ पुगेका छन् ।

नेपाल भ्रमणमा आउने पर्यटको औषत बसाई अवधि विगत १० वर्षदेखि १२ दिनको हाराहारीमा रहेको छ । २०६९ पुससम्म पर्यटकको औषत बसाई अवधि १२.८७ दिन रहेकोमा २०७० पुसमा झन घटेर १२.५७ दिनमा झरेको छ । पर्यटनबाट प्राप्त आम्दानी पनि अघिल्लो पुसको तुलनामा गत पुसमा घटेको देखिन्छ ।

२०६९ पुससम्म पर्यटनबाट ३० अर्ब ७० करोड रुपैयाँ आम्दानी भएकोमा यस पुससम्म ३० अर्ब ४३ करोड रुपैयाँमात्र आम्दानी भएको छ । प्रति पर्यटक आम्दानी अघिल्लो पुसमा ३८ हजार २ सय ३० रुपैयाँ रहेकोमा यस पुससम्म घटेर ३८ हजार १ सय ४४ रुपैयाँ भएको छ ।

जीडीपीमा योगदान घट्यो

एउटा पर्यटकले नेपालमा दैनिक ३ हजार ३६ रुपैयाँ खर्च गर्ने गरेको आर्थिक सर्भेक्षणले देखाएको छ । प्रतिपर्यटक प्रतिदिन खर्च ३४.४९ डलर र कुल ग्राहस्थ्य उत्पादन १ लाख ७५ हजार २ सय ७४ डलर रहेको छ । पुससम्मको तथ्यांक हेर्दा जीडीपीमा पर्यटन क्षेत्रको योगदान घटेको छ ।

अघिल्लो पुुसमा पर्यटन क्षेत्रको जीडीपीमा २ प्रतिशत रहेकोमा यस पुसमा १.७ प्रतिशतमा झरेको छ । नेपाल भित्रिएका पर्यटकबाट १ लाख ७८ हजार जनाले प्रत्यक्ष रोजगारी प्राप्त गरेका छन् ।