३ असार, काठमाडौं । नेपाली कांग्रेसका नेता रामचन्द्र पौडेलले प्रधानमन्त्री केपी शर्मा ओलीमाथि सर्वसत्तावादी चरित्र देखाएको आरोप लगाएका छन् ।
नेपाल प्रेस युनियनले शुक्रबार काठमाडौंमा गरेको कार्यक्रममा कांग्रेस नेता पौडेलले आफूहरुसँग सल्लाह नै नगरी एकतर्फीरुपमा संविधान कार्यान्वयनको कार्ययोजना बनाएर प्रधानमन्त्री ओलीले सर्वसत्तावादी चरित्र देखाएको आरोप लगाए ।
संविधान कार्यान्वयनका लागि राष्ट्रिय सहमति चाहिनेमा प्रधानमन्त्री ओलीले अविश्वास बढाएर मुलुकलाई संकटमा पार्न खोजेको उनको आरोप छ । प्रमुख दल र आन्दोलनरत दलबीचको एकता मुलुकको अहिलेको आवश्यकता भएको भन्दै सरकारी कार्ययोजनाका आधारमा संविधान कार्यान्वयन हुन नसक्ने बताए ।
कांग्रेस नेता पौडेलले सरकार र आन्दोलनकारी मधेसवादी दलबीच वार्ता गराएर समस्याको निकास खोज्ने काँग्रेसले भूमिका खेल्नुपर्ने भन्दै उनले यसमा पार्टी सभापति देउवा असफल भएको आरोप समेत लगाएका छन् ।
कार्यक्रममा कांग्रेसका अर्का नेता कृष्णप्रसाद सिटौलाले संविधान कार्यान्वयन नभए त्यसको जिम्मेवारी कांग्रेसले लिनुपर्ने बताए । आफ्नो नेतृत्वमा जारी भएको संविधानको कार्यान्वयनका लागि कांग्रेसले सरकारलाई सही बाटोमा हिंडाउन सक्नुपर्ने अन्यथा सरकारमाथि दोष थोपरेर काँग्रेस उम्किन नपाउने उनको भनाइ छ ।
