१५ मंसिर, काठमाडौं । काठमाडौं क्षेत्र नम्बर १ का नेपाली कांग्रेस प्रतिनिधिसभा सदस्य उम्मेदवार प्रकाशमान सिंहले चुनावी घरदैलो कार्यक्रम अन्त्य गरेका छन् ।
काठमाडौं महानगरपालिका ११ भोटेबहाल क्षेत्रमा शुक्रबार बिहान अन्तिम घरदैलो कार्यक्रम गरेका उनले मतदाताको ‘बडी ल्याङ्ग्वेज’बाट आफू उत्साहित भएको बताए ।
प्रकाशमानले कात्तिक २० गतेदेखि मतदातासँग भेटघाट गर्दै भोट माग्न घरदैलो अभियान सुरु गरेका थिए । घरदैलो कार्यक्रम मैझारो गर्दै उनले भने, ‘शुरुदेखि अन्तसम्म स्वागतको शैली र बडी ल्याङ्ग्वेज देखेर लाग्यो, राजनीतिमा जनप्रतिनिधिले जित्ने भनेको जनताको विश्वास हो, मन हो । त्यो मैले जितिसकेको छु ।’
भेटघाटको क्रममा मतदाताले निर्वाचन क्षेत्र मात्र होइन, देश विकास गर्न सुझाव दिएको प्रकाशमानले बताए । भ्रष्टाचार निर्मुल गर्नुपर्यो, सुशासन ल्याउनुपर्यो, जनतालाई सुख सुविधाका साथ सुरक्षित तवरले बस्ने वातावरण सरकारले बनाइदिनुपर्यो भन्ने आम मतदाताको माग रहेको उनको भनाइ छ ।
प्रकाशमानले भने, ‘यसभन्दा अगाडि मैले संविधान लेखन कार्यमा समय धेरै व्यतित गर्नुपर्यो । अब नेपाली कांग्रेसको नेतृत्वमा शान्ति र संविधान, नेपाली कांग्रेसकै नेतृत्वमा समृद्धिको अभियान भन्ने जुन नारा छ त्यसको लक्ष्यमा पुर्याउनको लागि काम गर्छु ।’
विगतको निर्वाचन जस्तै यस पटकको प्रतिनिधिसभा सदस्य निर्वाचनमा पनि मतदाताले मत दिने उनको विश्वास छ ।
२५ दिनको अवधिमा हरेक दिन दैनिक पाँच घण्टासम्म घरदैलो कार्यक्रम गरेको प्रकाशमान सिंहका सहयोगी यूपी लामिछानेले जानकारी दिए । ‘मतदाताको घरमै पुगेर फेस टु फेस भेटघाट गर्ने घरदैलो कार्यक्रम आजबाट सकिएको छ,’ लामिछानेले भने, ‘अब १७ गते नयाँबानेश्वरमा चुनावीसभा आयोजना हुनेछ ।’
काठमाडौं क्षेत्र नम्बर १ मा प्रकाशमान सिंहसँगै वाम गठबन्धनबाट माओवादी केन्द्रका अनिल शर्मा र विवेकशील साझा पार्टीका रविन्द्र मिश्र चुनावी प्रतिस्पर्धामा छन् ।