१३ वैशाख, काठमाडौं । विद्यार्थी भर्ना अभियानमा प्रधानमन्त्री मात्र होइन, मन्त्री र सांसदहरुले पनि सक्रिय सहभागिता जनाएका छन् । स्कुल-स्कुलमा पुगेर अभिभावकत्व ग्रहण गरिरहेका छन् । यसले थुप्रै बालबालिकालाई पढ्ने मौका दिएको छ ।
तर, मन्त्री र सांसदहरु स्कुलमा पुग्दा साना बालबालिकालाई लाइन लगाएर स्वागत गराउने पनि गरिन्छ । कहिलेकाहीँ घन्टौ लाइनमा राख्ने गरिएको छ ।
शिक्षामन्त्री गिरिराजमणि पोखरेल गोरखाको पालुङटार नगरपालिका ८ लुइँटेलमा रहेको अमर ज्योति जनता माविमा पुग्दा पनि विद्यार्थीहरुले लाइन लागेर स्वागत गरेका थिए ।
अब भने यसमा रोक लाग्ने भएको छ । शिक्षामन्त्री पोखरेलले अतिथि स्वागतका नाममा बालबालिकालाई लाइन लगाउन रोक लगाइने बताएका छन् । उनले भने, ‘देशभर परिपत्र गर्न मैले सचिवज्यूलाई भनिसकेको छु ।’
अब स्कुलमा अतिथि स्वागतका नाममा बालबालिकालाई लाइन लगाउने नपाइने उनले बताए ।
साथै स्वागतमा खादा र माला प्रयोगलाई पनि निरुत्साहित गरिने उनले बताए । ‘स्कुल कमाउण्डमा फूलेको फूल दिए हुन्छ, खादा माला चाहिँदैन’ उनले भने ।
त्यसको सुरुवात आफूले बुधबार गोरखाको बारपाकबाट गरिसकेको पनि मन्त्री पोखरेलले बताए ।