६ भदौ, काठमाडौं । पूर्वराजदूत केशवराज झा हत्या प्रकरणमा पक्राउ परेका ३ जनाको बुधबार प्रहरीले ‘पोलिग्राफ’ परीक्षण गरेको छ ।
घटनाको अनुसन्धान गरिरहेको महानगरीय अपराध अनुसन्धान महाशाखाले झाको घरमा सेफको रुपमा कार्यरत् सानु तामाङ र दुई जना मालीको ‘पोलिग्राफ’ परीक्षण गरेको हो ।
यसअघि गत आइतबार राति थापाथलीस्थित आफ्नै निवासमा छुरी प्रहार गरेर पूर्वराजदूत झाको हत्या भएको थियो ।
घटनाको ३ दिन वितिसक्दा पनि प्रहरीले हालसम्म बलियो सुराक भेट्न नसकिरहेका वेला ३ जनाले दिएको बयान सही हो या झुठो भन्ने विषयको निक्यौल गर्न ‘पोलिग्राफ टेस्ट’ गरिएको छ ।
अनुसन्धानमा खटिएका एक अधिकारीले अनलाइनखबरसँग कुरा गर्दै पोलिग्राफ टेस्ट भइसके पनि रिपोर्ट आइनसकेको बताए । ‘रिपोर्ट आएपछि थप केही खुल्ला’, ती अधिकारीले भने ।
झाको हत्या सम्बन्धमा विभिन्न कोणबाट अनुसन्धान भइरहेको महाशाखाका प्रमुख एसएसपी धिरजप्रताप सिंह बताउँछन् ।
यो पनि पढ्नुस्
पूर्वराजदूत झा हत्या प्रकरणः कुक र दुई माली नियन्त्रणमा
