७ चैत, काठमाडौं । भारतमा एक क्रिकेट खेलाडीको ब्याटिङ गर्दागर्दै मृत्यु भएको छ । बुधबार कलकत्तामा अभ्यास गरिरहेका बेला २२ वर्षीय सोनु यादवको मृत्यु भएको हो ।
ब्याटिङ गर्ने क्रममा उनी एक्कासी भुइँमा लडेको र अस्पताल लैजाँदा लैजाँदै मृत्यु भएको भारतीय मिडियाहरुले जनाएका छन् ।
सोनु यादव सेकेन्ड डिभिजनका खेलाडी थिए । खेल्दाखेल्दै उनको स्वास्थ्य बिगि्रएको थियो । साथीहरुले उनलाई आराम गर्न भनेका थिए । तर पनि उनको स्वास्थ्य झन् जटिल हुँदै गयो । त्यसपछि सोनुलाई सुरुमा क्रिकेट एसोसिएशन अफ बंगालको मेडिकल युनिटमा लगियो । त्यहाँबाट उनलाई एसएसकेएम अस्पताल पठाइयो, त्यहाँका डाक्टरहरुले उनलाई मृत घोषणा गरे ।
सोनुको मृत्युको कारण खुलेको छैन ।
क्लबका अधिकारी श्यामल बनर्जीले भनेका छन्- मलाई सोनु हामीमाझ नरहेको मलाई विश्वास लागिरहेको छैन । उनी निकै प्रतिभाशाली क्रिकेट खेलाडी थिए । मैले दिउँसो उनको निधनको खबर थाहा पाएँ । उनी आफ्ना साथीहरुसँग खेलिरहेका थिए, क्लबको त कुनै म्याच थिएन ।
