भत्ता दिन जनप्रतिनिधि घरघरमा, ज्येष्ठ नागरिक दंग

२० जेठ, काठमाडौं । देशमा लकडाउन छ । अन्य समयमा पनि बाहिर निस्कन नपाएर घरमै बस्नु परेका ज्येष्ठ नागरिकहरुका लागि यो समय झन पट्यार लाग्दो भएको छ । सरकारले उपलब्ध गराउने सामाजिक सुरक्षा भत्ता लिन पनि धेरै ज्येष्ठ नागरिकहरु जान सकेका छैनन् । यसको दुई वटा कारण छन् । एउटा– लकडाउन, अर्को हिडडुल गर्न नसक्नु ।

तर पछिल्ले समय जनप्रतिनिधिहरु घरघरमै गएर भत्ता बुझाउन थालेपछि भने ज्येष्ठ नागरिकको मुहारमा खुसी छाउने गरेको छ । सोमबारमात्रै काठमाडौं महानगरपालिकाले वडा नम्बर १८ मा वरिष्ठ ज्येष्ठ नागरिकहरुलाई घरघरमै गएर भत्ता वितरण गर्यो ।

वडाध्यक्ष न्हुच्छेकाजी महर्जनले घरघरमै पुगेर भत्ता वितरण गरे । इखापोखरीकी ८९ वर्षीया विष्णुप्रिया मालीको निवासमा बरिष्ठ ज्येष्ठ नागरिक भत्ता बोकेर पुग्दा मालीको अनुहारमा खुशीको चमक देखिन्थ्यो । वडाध्यक्ष महर्जनले मालीको हातमा बरिष्ठ ज्येष्ठ नागरिक भत्ताका रुपमा रु १२ हजार थमाएपछि विष्णुप्रियाले नेवारी लवजमै औधी खुशी लागेको प्रतिक्रिया दिइन् ।

वडा–१८ कै भुरुङखेलकी ८८ वर्षीया सुधादेवी प्रधानले पनि यसरी जनप्रतिनिधिलाई भत्तासहित आफ्नै निवासमा देख्दा स्थानीय सरकार घर–दैलोमै आएको अनुभव सुनाउछिन् ।

उनीहरु त प्रतिनिधि पात्र मात्रै हुन्, भत्ता लिएर जनप्रतिनिधि घरमै आए पछि ज्येष्ठ नागरिकहरु खुसी छन् ।

काठमाडौँ महानगरपालिकाल ३२ वटै वडामा स्थायी वासोवास गर्ने ७५ वर्ष पुगेका महिला र ८० वर्ष पुगेका पुरुष बरिष्ठ ज्येष्ठ नागरिकलाई घर–घरमै पुगेर महानगर बिशेष भत्ता उपलब्ध गराउँदै आएको छ । ३२ वटै वडामा स्थायी वासोवास गर्ने यस्ता बरिष्ठ ज्येष्ठ नागरिक ९ हजार १ सय १७ जना छन् ।

त्यसैगरी महानगरपालिकाले पूर्ण अपाङ्गता भएका ४ सय ४५ जनालाई पनि यहि बेला बिशेष भत्ता घर–घरमै पुर्याउँदै छ । त्यसका लागि महानगरपालिकाले ३२ वटै वडालाई रकम निकासा गरिसकेको छ ।

बन्दाबन्दीको अवस्थामा बिशेष भत्ताले केही राहत महशुस होस भनी घर–घरमै लगेर वितरणको व्यवस्था गरेको महानगरपालिकाका प्रमुख बिद्यासुन्दर शाक्य बताउछन् ।

दुःखका बेलामा पनि महानगरपालिका हाम्रो साथमा छ भन्ने महशुस होस भन्ने मनसायले यही बेला भत्ता उपलब्ध गराएको उनले बताए ।

उनले विगतमा महानगरपालिकाले विशेषज्ञ चिकित्सकको टोलीसहित ज्येष्ठ नागरिकको घर–घरमै गई निशुल्क स्वास्थ्य परीक्षण सेवा उपलब्ध गराउने लगायतका काम गरेको जानकारी दिए ।

‘३२ वटै वडामा ९ हजार १ सय १७ बरिष्ठ ज्येष्ठ नागरिक रहेको हामीलाई तथ्याङ्क प्राप्त भएको छ,’ उनले भने, ‘ती सबै बरिष्ठ ज्येष्ठ नागरिकलाई घर–घरमै पुगेर जनप्रतिनिधिले भत्ता उपलब्ध गराउनु हुनेछ ।’