१९ असार, काठमाडौं । कप्तान सर्गियो रामोसको एक मात्र गोलमा गेटाफेलाई पराजित गर्दै रियल मड्रिडले स्पानिस ला लिगाको उपाधि होडलाई बलियो बनाएको छ ।
रामोसले दोस्रो हाफमा गरेको पेनाल्टी गोलको मद्दतमा रियलले गेटाफेलाई १-० ले पराजित गरेको हो । रामोसले ७८औं मिनेटमा गोल गरेका हुन्। गेटाफेका माथियस ओलिभेरारले डानी कार्भाजललाई फाउनल गरेपछि रियलले पेनाल्टी पाएको थियो ।
कोरोना भाइरसपछि फेरि सुरु भएको लिगमा ६ खेल खेल्दा रामोसले ४ गोल गरिसकेका छन् ।
जितपछि रियलले दोस्रो स्थानको बार्सिोनासंग अंकदूरी ४ बनाएको छ । कोरोनाभाइरपछि लिग सुरु हुँदा बार्सिलोना २ अंकले अघि थियो ।
तर त्यसपछि रियलले अहिलेसम्म लगातार जित हात पार्दा बार्सिलोनाले भने लगातार ३ खेल बराबरी खेलेको छ ।
जितपछि रियलो ३३ खेलबाट ७४ अंक छ भने बार्सिलोनाको ७० अंक छ र ला लिगामा अब पाँच चरणका खेलहरु बाँकी छ ।
