२३ असोज, हेटौंडा । बागमती प्रदेशका मुख्यमन्त्री डोरमणि पौडेलले अहिले तीनै तहका सरकारले वितरणमुखी बजेट प्रस्तुत गरिरहेको भन्दै यसलाई सुधार्न जरुरी रहेको बताएका छन् ।
‘बजेटलाई अहिले पनि छर्ने परिपाटी रहेको छ, यसलाई हामीले अन्त्य गर्नुपर्छ’ शुक्रबार प्रदेश नीति तथा योजना आयोगले तयार पारेको ‘दिगो विकासका लक्ष्यहरू ः बागमती प्रदेशको अवस्था तथा मार्गचित्र’ बिमोचन गर्दै उनले भने ।
मुख्यमन्त्री पौडेलले मौलिक हकको प्रत्याभूति हुने गरी बजेट कार्यान्वयन गर्नुपर्ने दायित्व तीनै तहको सरकारको भएको पनि बताए ।
उनले आयोगले राखेका लक्ष्य पूरा गर्न केही चुनौती भए पनित्यसका लागि सरकारी र गैरसरकारी, निजी र सामुदायिक क्षेत्रबीच रणनीतिक साझेदारी हुन आवश्यक रहेको बताए ।
