साउथ सुपरस्टार रजनीकान्तले डिसेम्बर ३१ मा नयाँ राजनीतिक पार्टी घोषण गर्ने कार्यक्रम केही समय अगाडि नै तय भएको थियो । तर, शारीरिक रुपमा अस्वस्थ भएपछि रजनीकान्तले नयाँ राजनीतिक पार्टी घोषणा गर्ने कार्यक्रम स्थगित भएको छ ।
रजनीकान्तले सामाजिक संजालमा ३ पेज लामो प्रेस विज्ञप्ती सार्वजनिक गर्दै जनतासँग माफी मागेका छन् । रजनीकान्तले भनेका छन्–‘नयाँ राजनीतिक दल घोषणा गर्ने कार्यक्रम स्थगित गर्नुपर्दाको पीडा मैले मात्र वुझ्न सक्छु । म चुनावी राजनीतिमा नउत्रिकन जनताको सेवा गर्न तयार छु ।’
७० बर्षका नायकले सन् २०२१ को जनवरीमा तमिलनाडुमा हुन लागेको विधानसभा चुनाव भन्दा पहिला नै नयाँ पार्टी घोषणा गर्ने आशा जनतामा थियो ।
अस्वस्थ भएपछि रजनीकान्तलाई हैदरावादको एक नीजि अस्पतालमा भर्ना गरिएको थियो । उनी डिसेम्बर २७ मा अस्पतालबाट डिस्चार्ज भएका थिए । उनलाई डाक्टरले केही हप्ता आराम गर्न सल्लाहा दिएका छन् ।
कोरोना भाइरसको संक्रमणबाट बच्नका लागि पनि उनले केही समय भेटघाटलाई समेत पूर्ण रुपमा बन्द गरेका छन् ।
सन् २०१७ मा रजनीकान्तको मृगौला प्रत्यारोपण गरिएको थियो । तर, यो बर्षको सुरुवातमै उनले तामिलनाडुका जनताको सेवाका लागि आफू तयार भएको बताएका थिए ।
