१ चैत, काठमाडौं । म्यानमारको सत्तारुढ पार्टीको समानान्तर सरकारले सेनाबाट शक्ति आफ्नो हातमा लिन ‘क्रान्ति’ गरिने बताएको छ । नेशनल डेमोक्रेटिक पार्टीका वरिष्ठ नेता मान विन खाइयाङ थानले सामाजिक सञ्जाल फेसबुकमार्फत् सम्बोधन गर्दै भनेका छन्, ‘यो मुलुकको लागि कालो र बिहानी हुन लागेको क्षण हो ।’
उनले प्रदर्शनकारीहरुलाई सेनाबाट बचाउन सक्ने गरी आवश्यक नियम ल्याइने पनि बताए । शनिबार म्यानमारमा सेनाविरुद्ध भएको प्रदर्शनको क्रममा कम्तीमा १३ जनाको मृत्यु भएको थियो । यससँगै म्यानमारमा सेनाविरुद्धको आन्दोलनमा ज्यान गुमाउनेको संख्या ८० नाघेको छ । अहिलेसम्म यो आन्दोलनको क्रममा पक्राउ पर्नेको संख्या पनि २१ सय नाघेको छ ।
म्यानमारको सेनाले निहत्था मानिसहरुलाई युद्धमा उभिएको जस्तो व्यवहार गरेको मानव अधिकारवादीहरुले बताएका छन् । शनिबार प्रहरीको गोली लागि मृत्यु हुनेमा १३ वर्षीय एक बालक पनि छन् ।
प्रदर्शनकारीहरुलाई गोली हानी मारेको विषयमा सेनाले कुनै प्रतिक्रिया दिएको छैन । तर, सेनाले मुलुकमा भइरहेको प्रदर्शन आपराधिक भएको दाबी गर्दै आएको छ ।
-एजेन्सीहरुको सहयोगमा