सनराइज बैंकको लाभांश घोषणा, ६ प्रतिशत बोनस दिने

२३ कात्तिक, काठमाडौं । सनराइज बैंक लिमिटेडले हालसम्म लाभांश घोषणा गरेका बैंकहरु मध्ये सबैभन्दा कम लाभांश घोषणा गरेको छ । यसअघि कुमारी बैंकले सबैभन्दा कम अर्थात ८.६७ प्रतिशत लाभांश घोषणा गरेको थियो ।

सनराइज बैंकले गत आर्थिक वर्षसम्मको सञ्चित मुनाफाबाट शेयरधनीहरुलाई ६.६५ प्रतिशत बोनस शेयर र त्यसमा लाग्ने कर प्रयोजनार्थ ०.३५ प्रतिशत नगद लाभांश गरी कुल ७ प्रतिशत लाभांश वितरण गर्ने घोषणा गरेको छ ।

सोमबार बसेको बैंक सञ्चालक समितिका बैठकले यस्तो निर्णय गरेको हो । कम्पनीले निर्णयको जानकारी नेपाल स्टक एक्सचेञ्जमा गराइसकेको छ ।

अब नेपाल राष्ट्र बैंकले स्वीकृति दिएपछि साधारणसभामा उक्त प्रस्ताव पेश हुनेछ । साधारणसभाबाट पारित भएपछि कम्पनीले शेयरधनीलाई बोनस शेयर दिनेछ ।