२४ माघ, काठमाडौं । स्पानिस ला लिगाको आइतबार रातिको खेलमा बार्सिलोनाले एट्लेटिको मड्रिडमाथि ४-२ को जित हात पारेको छ ।
घरेलु मैदान क्याम्प नोउमा एक गोलले पछि परे पनि उत्कृष्ट प्रदर्शन गर्दै १० खेलाडीमा समेटिएको बार्सिलोनाले जित हात पारेको हो ।
खेलको केन्द्र बनेका डानी अल्भ्जले एक गोल र एक असिस्ट गरे । तर उनै डानी दोस्रो हाफमा सिधा रातो कार्ड पाउँदै मैदान बाहिरिए ।
खेलको आठौं मिनेटमा यानिक कारास्कोले गोल गर्दै एट्लेटिकोलाई १-० को अग्रता दिलाएका थिए ।
तर अग्रता लामो समय टिकेन । दशौँ मिनेटमा जोर्डी अल्बाले डानी अल्भ्जको पासमा उत्कृष्ट गोल गर्दै बार्सिलोनालाई १-१ गोलको बराबरीमा ल्याए ।
२१औं मिनेटमा गाभीले गोल गरेपछि बार्सिलोना २-१ को अग्रता बनायो । ४३औं मिनेटमा रोनाल्डो अरुजोले गोल गरेपछि बार्सिलोनाले पहिलो हाफमा ३-१ को अग्रता बनायो ।
दोस्रो हाफमा पनि बार्सिलोना रोकिएन । खेलको ४९औं मिनेटमा डानी अल्भ्सले गोल गर्दै बार्सिलोनालाई ४-१ को अग्रता दिलाए ।
५८औं मिनेटमा बार्सिलोनाका पूर्वखेलाडी लुइस सुआरेजले एट्लेटिकोका लागि दोस्रो गोल गरे ।
खेलको ६९औं मिनेटमा अल्भ्सले रातो कार्ड पाउँदै मैदान बाहिरिएपछि बार्सिलोना १० खेलाडीमा समेटिएको थियो ।
यस जितपछि बार्सिलोना २२ खेलमा ३८ अंक जोड्दै एट्लेटिकोलाई पछि पार्दै चौथो स्थानमा उक्लेको छ ।
एट्लेटिको ३६ अंकसहित पाँचौं स्थानमा छ ।
प्रतिक्रिया 4