मास्क लगाउँदा चश्मामा बाफ जम्मा हुन नदिने के गर्ने ?
२०७९ साउन २६ गते १२:०१ 
काठमाडौं । कोरोना भाइरस संक्रमण सुरु भएपछि संसारभर नै मास्क अनिवार्यजस्तै बनिसकेको छ । पहिले धुँवाधुलोबाट जोगिन एकाधले मास्क लगाए पनि अहिले अधिकांश व्यक्ति नियमित रुपमै मास्क प्रयोग गर्छन् ।
मास्क अहिले दैनिक जीवनको हिस्सा नै बनेको छ । भाइरस संक्रमणबाट बचाउने यसले महत्वपूर्ण भूमिका खेल्ने जनस्वास्थ्यविद्हरुले बताउँदै आएका छन् ।
तर नियमित रुपमा चश्मा लगाउनेहरुलाई मास्क लगाउन समस्या हुने गरेको छ । कारण, चश्मा र मास्क एकैचोटि लगाउँदा मुखबाट आएको बाफले चश्मालाई ढाक्छ र राम्रोसँग देख्नमा समस्या उत्पन्न हुन्छ ।
त्यसैले धेरैले यस्तो समस्यालाई कसरी समाधान गर्ने भनेर सोचिरहेका हुन्छन् । चस्मामा बाफ जम्मा हुने समस्याको समाधानका लागि के-के कुरामा ध्यान दिने भन्ने विषयमा नेत्ररोग विशेषज्ञ डा. प्रतीक्षा अमात्यको सुझाव यस्तो छ :
चश्मामा बाफ जम्मा हुनबाट बच्ने उपाय
-आजभोलि बजारमा बाफ जम्मा नहुने खालको चस्मा पाइन्छ । त्यो चश्माको प्रयोग गरियो भने पनि मास्क लगाउँदा बाफ जम्मा हुने समस्या हुँदैन । बाफ जम्मा नहुने चश्मा नर्मल पावरको बनाउँदा त्यसको मूल्य २५ सय रुपैयाँ पर्छ ।
-मास्कको नाकको भाग त्रिकोणीय वा भी आकारको हुनुपर्छ, साथै नाकमा राम्ररी फिट हुनुपर्छ । मास्कको नाकको भागमा फलामको रड प्रयोग भएको हुन्छ त्यसलाई राम्ररी प्रेस गरेर लगाउँदा पनि राम्ररी फिट हुन्छ र बाफ जम्मा हुन पाउँदैन ।
-मास्क लगाउँदा नाकमा टेप लगाउने । नाकमा टेप लगाएर मास्क लगाइयो भने चस्मामा बाफ जम्मा हुँदैन ।
-मास्कको डोरीलाई राम्ररी कसेर राम्ररी फिट हुने गरी लगाउँदा पनि चश्मामा बाफ जम्मा हुने समस्या हुँदैन ।
-सधैं पहिले मास्क लगाउने र त्यसपछि मात्रै चश्मा लगाउनुपर्छ यसो गर्दा मास्कलाई चश्माले थिच्छ र बाफ चश्मामा बस्न पाउँदैन ।
-चश्मा लगाउनु भन्दा अघि त्यसलाई साबुनपानीले धोएर लगाउने र त्यसपछि मास्क लगाउने । यसो गर्दा पनि केही मात्रामा भए पनि बाफ कम बस्छ ।
प्रतिक्रिया 4