लामो समय मोबाइलमा कुरा गर्दा उच्च रक्तचापको जोखिम हुन्छ ?

काठमाडौं । तपाईं फोनमा कति समय कुरा गर्नुहुन्छ ? हालैको एक अध्ययनले मोबाइलमा लामो समय कुरा गर्नेलाई उच्च रक्तचापको जोखिम हुने खुलासा गरेको छ । युरोपियन सोसाइटी अफ कार्डियोलोजी (ईएससी)ले गरेको एक अध्ययनले ३० मिनेटभन्दा बढी मोबाइलमा लगातार कुरा गर्ने व्यक्तिको रक्तचाप बढ्न सक्ने देखाएको छ । यो अध्ययन चीनको साउथ मेडिकल विश्वविद्यालयसँगको सहकार्यमा भएको हो ।

अध्ययनका लेखक प्रोफेसर सियानहुई किन भन्छन्, ‘मानिसहरू आफ्नो सबैभन्दा बढी समय मोबाइलमा बिताउँछन् । त्यसमा पनि ३० मिनेटभन्दा बढी कुरा गर्नु मुटुको लागि जोखिम छ, त्यसैले धेरै सावधानी अपनाउनुपर्ने हुन्छ ।’ यद्यपि यसमा अझै अध्ययन हुन आवश्यक रहेको उनी बताउँछन् ।

अध्ययनको नतिजा

उक्त अध्ययनले विश्वको कुल जनसंख्याको दुई तिहाइले मोबाइल फोन प्रयोग गर्ने देखाएको छ । अत्यधिक प्रयोग गर्दा मोबाइलले रेडियो तरंग छोड्छ, जसले उच्च रक्तचापको जोखिम बढाउन सक्ने अध्ययनले जनाएको छ । मोबाइल फोन प्रयोगसँगै यसमा फोन कलले प्रभाव पार्छ कि पार्दैन भन्ने कुराको खोज पनि गरिएको थियो । अध्ययनमा बेलायतको यूके बायो बैंकको तथ्यांक प्रयोग गरिएको छ ।

१२ वर्ष लगाएर गरिएको अध्ययनमा उमेर, लिंग, बडी मास इन्डेक्स, जात-समुदाय, अभाव, उच्च रक्तचापको पारिवारिक इतिहास, धुम्रपान अवस्था, रक्तचाप, रगतमा ग्लुकोजको विश्लेषण गरेपछि निस्कर्ष निकालेको प्रोफेसर सियानहुई बताउँछन् ।

मोबाइल प्रयोग नगर्नेको तुलनामा मोबाइल फोन प्रयोगकर्ताहरूलाई उच्च रक्तचापको जोखिम सात प्रतिशत बढी थियो । यस्तै मोबाइल फोनमा हप्तामा ३० मिनेट वा सोभन्दा बढी कुरा गनेहरुलाई ३० मिनेटभन्दा कम समय बिताउनेको तुलनामा उच्च रक्तचापको नयाँ सुरुवात हुने सम्भावना १२ प्रतिशत बढी थियो ।

जियानहुईका अनुसार यस्तो नतिजा आए पनि यससँगै ठोस प्रमाण जुटाउन अझै थप अध्ययन जरुरी छ । तर पनि मुटुको स्वास्थ्यको लागि पनि मोबाइल कल कम गर्नु बुद्धिमानी हुने जियानहुई सुझाउँछन् ।

यस विषयमा नेपाल मेडिसिटी अस्पतालका मुटुरोग विभागका प्रमुख डा. रञ्जित शर्मा यसबारे धेरै अध्ययन अनुसन्धान भइसकेपछि मात्र केही भन्न सकिने बताउँछन् ।

‘घण्टौंसम्म कुरा गर्दा सुखदेखि दुःखका समेत कुरा हुन सक्छन् । तनावग्रस्त कुरा हुँदा त्यसले व्यक्तिमा उच्च रक्तचाप बढाउन सक्ला, ‘डा. शर्मा भन्छन्, ‘अध्ययनमा भनेजस्तै मोबाइलबाट निस्कने रेडियो फ्रिक्विनेसीले नै रक्तचाप बढाउँछ भन्ने कुराको थप अध्ययन बृहतस्तरमा हुन जरुरी हुन्छ । अहिले नै ठ्याक्कै फोन गरेर नै उच्च रक्तचाप बढ्छ भनेर किटान गर्न सकिने अवस्था छैन ।’

उनी अगाडि भन्छन्, ‘अहिले देखिएको निष्कर्षलाई बलियो बनाउने थप आधारहरुका खोजी र अध्ययनपछि निर्देशिकामा आउला । यसलाई आधार मानेर मात्रै टिप्पणी गर्नु उपयुक्त नहोला ।’

अस्तव्यस्त जीवनशैलीकै कारण युवादेखि वृद्धसम्ममा रक्तचापको समस्याले सताएको देखिन्छ । यससँगै लामो समयसम्म मोबाइल चलाउँदा व्यक्तिको जीवनशैली निष्क्रियतातर्फ बढ्न गई मानसिक तथा शारीरिक स्वास्थ्यमा असर गर्ने हुँदा त्यसको कम प्रयोग गर्न डा. शर्मा सुझाउँछन् ।