दुबई पठाइदिन्छु भन्‍दै ठगी गरेको आरोपमा एक जना पक्राउ

७ वैशाख,  काठमाडौं। दुबई पठाइदिन्छु भन्‍दै पीडितबाट ९ लाख ५० हजार रुपैयाँ ठगी गरेको आरोपमा प्रहरीले एक जनालाई पक्राउ गरेको छ ।

पक्राउ पर्नेमा काभ्रेपलाञ्चोकको चौरीदेउराली गाउँपालिका-६ घर भई हाल काठमाडौको बुढानीलकण्ठ नगरपालिका-१० कपन आकाशेधारा बस्‍ने २९ वर्षीय उमेश रिमाल रहेका छन् ।

काठमाडौं उपत्यका अपराध अनुसन्धान कार्यालयको टोलीले नयाँ बानेश्वरबाट उनलाई पक्राउ गरेको हो । पक्राउ परेका उनलाई थप अनुसन्धान तथा कारबाहीको लागि वैदेशिक रोजगार विभाग, बुद्धनगर पठाइएको प्रहरीले जनाएको छ ।

उनले १७ जनासँग वैदेशिक रोजगारीका लागि दुबई जान २ लाख रुपैयाँ लाग्छ र त्यहाँ कुखुरा फारममा काम पाइन्छ र मासिक ५० हजार रुपैयाँ तलब हुन्छ भनेर प्रलोभन दिएको पाइएको काठमाडौं उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीले जानकारी दिए ।