सहकारीमा केदारनाथको अपचलन : एउटालाई ऋण दिने माइन्युट, अर्कैमा लगानी

१५ असार, काठमाडौं । शिवशिखर र तुलसी सहकारीबाट सर्वसाधारणको करिब साढे १५ अर्ब निक्षेप अपचलन गरेका केदारनाथ शर्माले आफ्नै कम्पनीमा ऋण प्रवाह गर्दा पनि रेकर्ड नदेखिने किसिमको चलाखी गर्ने गरेको खुलेको छ ।

नेपाल प्रहरीको केन्द्रीय अनुसन्धान ब्यूरो (सीआईबी)का अनुसार विराटनगरको तुलसी बहुमुखी सहकारीबाट ऋण प्रवाह गर्दा एउटा व्यवसायमा दिने भनेर सञ्चालक समितिबाट निर्णय गराउने तर त्यो रकम अर्कै कम्पनीलाई दिने गरेको खुलेको हो ।

शिवशिखर तथा तुलसी सहकारीका सञ्चालक तथा शिखर अर्गनाइजेसनअन्तर्गतका ४३ कम्पनीका मालिक शर्मालाई प्रहरीले भारतको मुम्बईबाट पक्राउ गरी हिरासतमा राखेर अनुसन्धान गरिरहेको छ ।

सहकारी संस्थाले प्राइभेट लिमिटेड कम्पनीलाई ऋण दिन पाउँदैन । त्यही भएर शर्माले घरेलु तथा साना उद्योगमा दर्ता भएको फर्मलाई ऋण दिने गरी माइन्युट गर्ने तर त्यो रकम आफ्नो लगानीको प्राइभेट लिमिटेड कम्पनीमा सार्ने गरेको देखिएको अनुसन्धानमा संलग्न एक प्रहरी अधिकृतले बताए ।

‘घरेलुमा जुन नाममा दर्ता गरिएको फर्मलाई ऋण दिइएको हो, सोही नामको प्राइभेट लिमिटेड कम्पनी कम्पनी रजिष्ट्रारको कार्यालयमा दर्ता गरी सहकारीले दिएको ऋण मात्रै होइन, पुरानो कम्पनीको सम्पत्ति र मेसिनहरू पनि सारेको पाइयो,’ ती अधिकारीले भने ।

शर्माले तुलसी मोटरपम्प नाममा घरेलुमा व्यवसाय दर्ता गरी सहकारीको समेत लगानीमा विराटनगरमा व्यवसाय शुरु गरेका थिए । ‘त्यो व्यवसायले काम शुरु गरेर प्रतिफल आउने बेला तुलसी मोटरपम्पकै नाममा बुटवलमा प्रालि दर्ता गरेको पाइयो । त्यसपछि घरेलुमा दर्ता भएको फर्मलाई विस्तारै निष्क्रिय बनाएको देखिन्छ,’ अनुसन्धान गरीरहेको एक अधिकृतले भने ।

शर्माले विराटनगरमा घरेलुमा दर्ता गरेको फर्मको सम्पूर्ण पुँजी तथा सम्पत्ति बुटवलमा खोलिएको तुलसी मोटरपम्प प्रालिमा सारेका थिए । ‘मोरङमा तुलसी सहकारीले लगानी गरेको तुलसी मोटरपम्पको अब नाम मात्रै बाँकी छ,’ उनले भने ।

तुलसी सहकारीले तुल्सी मोटरपम्पलाई २४ करोड ५ लाख रुपैयाँ ऋण लगानी गरेको प्रहरीले उपलब्ध गराएको तथ्यांकमा उल्लेख छ ।

सहकारीको लगानी भएको फर्ममा सुकाउँदै आफ्नै नाममा भएको कम्पनीलाई अगाडि बढाउँदा सहकारीको लगानी डुब्ने र शर्माको प्राइभेट कम्पनी मोटाउने देखिएको छ । सिआईबीले पक्राउ परेका शर्माको बयान १५ असार शुक्रबारबाट सुरु गरेको छ ।

अन्य कम्पनीमा पनि शर्माले यसरी नै लगानी गरेको अनुसन्धान गरिरहेका एक अधिकारीले बताए । यसरी अन्य प्राइभेट लिमिटेड कम्पनीसमेतलाई गरी तुलसी सहकारीले नियमविपरीत ४१ करोड ६४ लाख रुपैयाँ लगानी गरेको प्रहरीले संकलन गरेको तथ्यांकमा देखिन्छ ।

सहकारीले सोही प्रकृतिको ऋण नटराज एग्रो प्रालिलाई ४ करोड २९ लाख, शिखर अर्गनाइजेशन प्रालिलाई ५ करोड ६७ लाख, तुलसी अनुसन्धान केन्द्र प्रालिलाई ४ करोड ३ लाख, गोरखा टी एन्ड कफी उद्योग प्रालिलाई २ करोड १५ लाख र शिवशिखर अर्गनाइजेशन प्रालिलाई १ करोड ४३ लाख रुपैयाँ प्रवाह गरेको हो । यसबाहेक केदारनाथ शर्मा अध्यक्ष रहको सहकारीबाट स्रोत अपचलन गर्दै शर्माकै कम्पनीहरू तुलसी राइस एण्ड चिउरा उद्योग, गार्डेन मार्ट लगायतमा ४६ करोडभन्दा बढी लगानी गरेको प्रहरीको अनुसन्धानबाट खुलेको छ ।

बाराका कर्मचारीको नाममा झापामा, झापाका कर्मचारीको नाममा रामेछापमा जग्गा

शर्माले सहकारी संस्थाको बचत रकम कर्मचारीका नाममा जग्गा खरीद गरेर पनि अपचलन गरेका थिए । जग्गा किन्दा पनि उनले चलाखी गर्ने गरेको प्रहरीले पत्ता लगाएको छ ।

‘पहिलो त उनले आफ्नो भन्दा पनि कर्मचारीको नाममा खरिद गरेकोले लगानी फेला पार्न समस्या परेको छ, अर्कातिर बाराको कर्मचारीको नाममा झापामा र झापाको कर्मचारीको नाममा रामेछापमा जग्गा किनेको देखिन्छ ।’ अन्यत्र जग्गा खरिद गर्दा पनि यस्तै चलाखी उनले गर्ने गरेको देखिएको उनले बताए ।

सहकारीको स्रोत दुरुपयोग गरी देशभर जग्गा

तुलसी सहकारीको स्रोत दुरुपयोग गरी शर्माले देशका विभिन्न भागमा १ सय १६ रोपनी जग्गा विभिन्न व्यक्तिका नाममा किनेको पनि प्रहरीले पत्ता लगाएको छ ।

शर्मा अध्यक्ष रहेको तुलसी सहकारीको मोरङ र झापाको विभिन्न स्थानमा गरी ६ वटा कित्तामा १४ हजार ८५१.७२ वर्गमिटर जग्गा रहेको छ । त्यस्तै शर्माकै नाममा उदयपुरमा २५ हजार ११८.४३३ वर्गमिटर जग्गा रहेको प्रहरीले फेला गरेको छ । केही समय अगाडिमात्रै शर्मासँगा सम्पत्ती लिएकी सविना न्यौपानेको नाममा मोरङमा नै २५३.९५ वर्गमिटर जग्गा रहको छ । उनी तुलसी सहकारी विराटनगरकी सचिवसमेत हुन्, जो अहिले पनि प्रहरी हिरासतमा छिन् ।

तुलसी सहकारीका प्रबन्धक मन्दिप खवासको नाममा समेत केदानाथ शर्माले जग्गा किनेका थिए । उदयपुरमा खवासको नाममा सहकारीकै स्रोतबाट ३ वटा कित्तामा ९ हजार ४६१ वर्गमिटर जग्गा किनेको प्रहरी स्रोतले जनाएको छ ।

शर्माले आफ्नो खाद्य उद्योगको व्यवस्थापक बन्टी अधिकारीको नाममा झापा र बारामा समेत गरी १७८४.२१ वर्गमिटर जग्गा खरीद गरेको प्रहरी स्रोतले जनाएको छ । शर्माका व्यवसायिक साझेदार छविलाल विशवकर्माको नाममा प्युठानमा ५ हजार ४८७ वर्ग मिटर जग्गा खरिद भएको देखिएको छ । यस्तै आदित्यराज भट्टराईको नाममा मोरङ र सुनसरीमा गरी करिब २४४८ वर्गमिटर जग्गा रहेको प्रहरी स्रोतले जनाएको छ ।

यसबाहेक शर्माले आफ्नो कम्पनीको विभिन्न कर्मचारीहरूको नाममा सिरहा, रामोछाप, बाँके, रुपन्देहीलगायतको जिल्लामा जग्गा किनेको हुनसक्ने अनुसन्धानमा संलग्न प्रहरी अधिकृतहरूको दाबी छ ।

शर्माका ४३ वटा कम्पनीमध्ये धेरै कम्पनीहरू आफ्नै जग्गामा रहेको र ती सम्पत्तिहरूमध्ये अधिकांश बैंकमा धितो रहेको समेत प्रहरी स्रोतको दाबी छ ।

३६ जिल्लामा अनुसन्धान

शिवशिखर सहकारीको ठगीको अनुसन्धान अहिले ३६ जिल्लाबाट भइरहेको प्रहरीको केन्द्रीय अनुसन्धान ब्युरोले जनाएको छ । जनतासँग उजुरी लिएर अनुसन्धान गर्न शिवशिखरको कारोबार भएका सबै जिल्लाका प्रहरी कार्यालयहरूलाई सिआईबीले पत्राचार गरेको छ ।

अनुसन्धान भएका जिल्लामध्ये चितवन, मकवानपुर, कञ्चनपुर, बाँके, बाग्लुङलगायतका मुद्दा नै दर्ता भइसकेको छ । यसबाहेक सुदुरपश्चिम प्रदेशको बैतडी, डडेलधुरा र कैलालीमा पनि प्रहरीले उजुरी लिएर अनुसन्धान गरिहेको जनाएको छ ।

केन्द्रीय अनुसन्धान ब्युरोले लुम्बिनी प्रदेशको दाङ, कपिलवस्तु, रुपन्देही, गुल्मी, अर्घखाँचीमा पनि अनुसन्धान गर्न पत्राचार गरेको छ । त्यस्तै कर्णाली प्रदेशको सुर्खेत र दैलेखमा पनि अनुसन्धानको लागि पत्राचार भएको छ । गण्डकी प्रदेशको बाग्लुङसहित म्याग्दी, लमजुङ, कास्की, गोरखामा पनि अनुसन्धान भइरहेको छ ।

बागमती प्रदेशका धादिङ, नुवाकोट, काठमाडौं, ललितपुर, काभ्रेपलाञ्चोक, दोलखा, रामेछाप, सिन्धुलीबाट समेत अनुसन्धान सुरु भएको प्रहरीले जनाएको छ । यसबाहेक कोशी प्रदेशको ओखलढुङ्गा, तेह्रथुम, इलाम र पाँचथरमा पनि अनुसन्धान अगाडि बढेको प्रहरीको केन्द्रीय अनुसन्धान ब्युरोले जनाएको छ । यसबाहेक भक्तपुरको ठगीको भने केन्द्रीय अनुसन्धान ब्युरो आफैले अनुसन्धान गरिरहेको छ ।

शर्माको शिवशिखर ग्रुपअन्तर्गतका ४३ कम्पनी र तिनका साझेदार

सहकारी संकट-१

यो पनि पढ्नुहोस

ओरियन्टलभन्दा पाँच गुणा ठूलो शिवशिखर सहकारी घोटाला

सहकारी संकट-२

यो पनि पढ्नुहोस

शिवशिखर सहकारी घोटाला प्रकरण : डिपार्टमेन्ट स्टोर र खाद्यान्न डिलर देखाउँदै पैसा उठाउँदै

सहकारी संकट-३

यो पनि पढ्नुहोस

बचत फिर्ता माग्न बचतकर्ता धाउँछन्, सहकारी भन्छ : पसलबाट पाँच हजारका सामान लैजानू

सहकारी संकट-४

यो पनि पढ्नुहोस

छोराछोरी पढाउँला भनेर जम्मा गरेको पैसा सहकारीले खाइदियो

सहकारी संकट-५

यो पनि पढ्नुहोस

तुलसी सहकारी घोटाला : सिटी सफारी चलाएर ८ वर्षमा कमाएको सबै पैसा सहकारीले खाइदियो