सावित्रालाई सर्वाधिक गोलकर्ताको अवार्ड

१७ फागुन, काठमाडौं । नेपाली राष्ट्रिय टिमकी फरवार्ड सावित्रा भण्डारी वाफ वुमन्स च्याम्पियनसिपको सर्वाधिक गोलकर्ताको अवार्ड जितेकी छिन् ।

क्लब ड्युटीका कारण फ्रान्स फर्केपछि जोर्डन विरुद्धको फाइनल गुमाएपनि सावित्राले ४ खेलमा एक ह्याट्रिकसहित सर्वाधिक ९ गोल गरेकी थिइन् । उनले सेमिफाइनलसम्म खेलेको चारै खेलमा गोल गरेकी थिइन् । इराक विरुद्ध ५ गोल गरेकी उनले प्यालेस्टाइन विरुद्ध २ तथा सिरिया र सेमिफाइनलमा लेवानोन विरुद्ध १-१ गोल गरेकी थिइन् ।

बिहीबार साउदी अरेबियाको जेद्दाहमा भएको फाइनलमा नेपाल जोर्डनसँग पेनाल्टीसुटआउटमा ५-३ ले पराजित हुँदै उपविजेता बनेको छ ।

यस्तै जोर्डनलाई च्याम्पियन बनाउने टिमकी कप्तान मायासा जिबाराह उत्कृष्ट खेलाडी घोषित भइन् भने जोर्डनकी गोलकिपर शेरिन उत्कृष्ट गोलकिपर चयन भइन् ।