अस्पतालमा बिरामी भेट्दै हुनुहुन्छ ? ७ कुरा ख्याल गरौं

कोही आफन्त, नातेदार, चिनेजानेका, साथीभाइ दुःख-बिमार भएर अस्पताल भर्ना भएका हुनसक्छन् । यस्तो अवस्थामा हामी अस्पताल पुग्ने गर्छौं, आडभरोसा दिनका लागि ।

यद्यपि, जसै बिरामीकहाँ पुग्छौं, हामीले अस्पतालको सामान्य मर्यादा पनि भुलिरहेका हुन्छौं । त्यो उपचार गर्ने ठाउँ हो, अरु पनि बिरामी हुन्छन् भन्ने कुराको हेक्का राख्दैनौं । त्यसैले होहल्ला गर्न थाल्छौं ।

त्यति मात्र होइन, अस्पतालमा बिरामी भेट्न जाँदा हामी धेरै त्रुटि गरिरहेका हुन्छौं ।

बिरामीसँग धेरै प्रश्नोत्तर नगर्ने

जब बिरामीलाई भेट्छौं, ‘अहिले के कसो छ’ भनी सोध्छौं । यहाँसम्म ठीकै छ । बिरामीलाई साह्रो–गाह्रो पो छ कि भनेर चासो राख्नु अस्वाभाविक होइन । यद्यपि, कतिपयले भने बिरामीलाई भेट्नासाथ अन्तर्वार्ता लिन सुरु गर्छन् । के भयो, कसरी भयो, कहाँ भयो ? इत्यादि । यसरी बिरामीलाई अनावश्यक केरकार गर्नु शोभनीय मात्र नहुने होइन, बरु थप पीडा दिन्छ । त्यसैले बिरामीलाई भेट्दा अनावश्यक रुपमा सोधीखोजी नगरौं ।

यदि बिरामीको बारेमा जान्नुपर्ने भए चिकित्सक, कुरुवासँग अलग्गै कुराकानी गर्न सकिन्छ ।

तडकभडक नगरौं

हामीकहाँ के देखिन्छ भने कुनै नेता-कार्यकर्ता, सानोतिनो चर्चा कमाएका, हुनेखाने कोही बिरामी परेर अस्पताल भर्ना भएका छन् भने मान्छेहरु सानोतिनो जुलुस लिएरै त्यहाँ पुग्ने गर्छन् । अस्पतालमा उनीहरु तडकभडक देखाउन थाल्छन् । चिकित्सकलाई दबाब दिने, कर्मचारीलाई हप्काउने गर्छन् ।

अस्पताल जस्तो संवेदनशील ठाउँमा यसरी तडकभडक गर्दा अरु बिरामी वा उपचारमा संलग्न स्वास्थ्यकर्मीहरुलाई असर पुग्छ ।

होहल्ला र भीडभाड नगरौं

कतिपय बिरामी भेट्न मान्छेहरुको भीड लाग्छ । उनीहरु होहल्ला गर्छन् । चर्को स्वरले गफ गर्छन् । पारिवारिक वा राजनीतिक कुरा समेत गरिरहेका हुन्छन् । अस्पतालमा बिरामी भेट्न जाँदा अलि संयमित हुनुपर्छ, शान्त हुनुपर्छ ।

आफ्नो स्वच्छतामा ध्यान दिने

बिरामी भेट्न जाँदै हुनुहुन्छ भने आफ्नो शारीरिक स्वच्छतामा पनि ध्यान दिनुपर्छ । किनभने बिरामीको भर्खर शल्यक्रिया गरिएको हुनसक्छ वा कुनै संक्रमणले थलिएको हुनसक्छ । यस्तो अवस्थामा हामीले थोरै लापरबाही गरिदिंदा थप संक्रमण फैलिन सक्छ । त्यसैले आफ्नो स्वच्छतामा ध्यान दिने गरौं ।

अरु बिरामीको बेडमा नबसौं

अस्पतालमा बिरामी भेट्न जानेहरु अरु खाली बेड देख्नासाथ त्यहाँ बस्ने, सुत्ने गर्छन् । यसरी अरु बिरामीका लागि तयार गरिदिएको बेडमा नबसौं, चाहे त्यो खाली नै भएपनि । यस्तो कुरामा आफैंलाई अनुशासित राख्नुपर्छ ।

के खानेकुरा लैजाने ?

हामीकहाँ बिरामी भेट्न जाँदा खाली हात जानु हुन्न भन्ने धारणा छ । त्यही कारण कतिपयले फलफूल बोक्छन् भने कतिपयले अरु स्वस्थ्यवर्द्धक खानेकुरा ।

यदि बिरामीको आर्थिक अवस्था कमजोर छ भने उनीहरुको आवश्यकताअनुसार खानेकुरा लगिदिनु राम्रो हो । तर औपचारिकता मात्र पूरा गर्नका लागि बिरामीलाई भएभरको खानेकुरा लगिदिनु त्यति बुद्धिमानी हुँदैन । यसो गर्दा अरु गरिब, विपन्न बिरामी वा उनीहरुका आफन्तलाई असहज हुन्छ । त्यसैले आवश्यक भएमा मात्र खानेकुरा लैजाने गरौं, देखाउनका लागि होइन ।

जथाभावी फोहोर नगरौं

अस्पताल परिसरमा फोहोरमैला नगरौं । आफूले खाएको खानेकुराको बोक्रा, खोललाई सही ठाउँमा बिसर्जन गरौं । बाध्यात्मक अवस्थाबाहेक अस्पतालमा बसेर बाहिर रेस्टुरेन्टबाट खानेकुरा मगाउने, खाने नगरौं । अस्पताललाई स्वच्छ, सफा राख्नु तपाईं हाम्रो दायित्व पनि हो ।

(पौडेल लुम्बिनी प्रादेशिक अस्पतालको नर्सिङ विभाग प्रमुख हुन् ।)

यो पनि पढ्नुहोस

सेवाग्राहीलाई थप बिरामी बनाउने वीरको लामो लाइन