२०८२ जेठ २ गते २२:१३ 
२ जेठ, काठमाडौं । आईसीसी विश्वकप लिग २ शृंखलाअघि अभ्यासका लागि युकेमा रहेको नेपाली टोलीले पहिलो एकदिवसीय अभ्यास खेलमा जित हासिल गरेको छ ।
नेपालले कार्डिफको न्यू पोर्ट टोलीलाई ३ विकेटले हराएको हो । २१३ रनको लक्ष्य नेपालले ३७.५ ओभरमा ७ विकेट गुमाएर पूरा गर्यो ।
कुनै समय १८ रनमै ५ विकेट तथा ५६ रनमा ६ विकेट गुमाएको नेपाली टोलीका लागि आरिफ र गुलशनले शतकीय साझेदारी गर्दै जितको आधार तय गरे ।
यी दुईले सातौं विकेटका लागि १३४ रनको साझेदारी गरे । गुलशन झाले सर्वाधिक ८० रन बनाए । आरिफ शेखले अविजित रहँदै ७३ रन बनाए ।
त्यसअघि टस जितेर पहिले ब्याटिङ गरेको कार्डिफले अलआउट हुँदै २१२ रन बनाएको थियो । कार्डिफका लागि ओपनर विल ट्रिपकोलीले शतकीय पारी खेल्दै सर्वाधिक ११८ रन बनाए ।
नेपालका कुशल भुर्तेलले ३ विकेट लिँदा दिपेन्द्रसिंह ऐरीले २ तथा रिजन ढकाल, ललित राजवंशी, सोमपाल कामीले १-१ विकेट लिए ।
नेपालले युकेमा थप ३ टोलीसँग अभ्यास खेल खेल्ने तय छ ।
प्रतिक्रिया 4