सहकार्य गरेर अघि बढ्न रास्वपालाई राजावादीको प्रस्ताव

News Summary

Generated by OK AI. Editorially reviewed.

संयुक्त जनआन्दोलन समितिले राष्ट्रिय स्वतन्त्र पार्टीलाई सहकार्यको प्रस्ताव गरेको छ।
सहकार्यको प्रस्ताव पत्रमा समितिले वर्तमान व्यवस्थामा न्यायिक र संवैधानिक अंगहरू दलीय हस्तक्षेपको शिकार भएको बताएका छन्।
आन्दोलनले १५ गतेदेखि देशव्यापी रुपमा चरम दलीयकरण र अव्यवस्थाको अन्त्य गर्न अभियान सुरु गर्नेछ।

७ जेठ, काठमाडौं । संवैधानिक राजसंस्था र सनातन हिन्दु अधिराज्यसहित बहुदलीय प्रजातन्त्र पुनर्स्थापनाका लागि गठित संयुक्त जनआन्दोलन समितिले राष्ट्रिय स्वतन्त्र पार्टी (रास्वपा)लाई सहकार्यको प्रस्ताव गरेको छ ।

समितिका संयोजक नवराज सुवेदीले रास्वपाका कार्यबाहक सभापति डीपी अर्याललाई पत्र लेखेर सहकार्यको प्रस्ताव गरेका हुन् । रास्वपाको मूल सैद्धान्तिक चिन्तन र वर्तमान व्यवस्था प्रतिको आलोचनालाई दृष्टिगत गरेर आन्दोलनमा सहकार्य गर्न प्रस्ताव गरेको पत्रमा सुवेदीले लेखेका छन् ।

सुवेदीले वर्तमान व्यवस्थामा रास्वपा सभापति रवि लामिछानेले निष्पक्ष न्याय पाउन सकिनेमा शंका व्यक्त भएको पत्रमा लेखेका छन् ।

‘राज्यका प्रमुख संवैधानिक तथा न्यायिक अंगहरू दलीय हस्तक्षेप र दलीयकरणको गम्भीर शिकार बनिसकेको सन्दर्भमा यस व्यवस्थाबाट तपाईंहरू पनि सन्तुष्ट हुनुहुन्न भन्ने हाम्रो बुझाइ छ,’ रास्वपालाई लेखिएको पत्रमा भनिएको छ ।

चरम दलीयकरण र अव्यवस्थाको अन्त्य गर्न राजसंस्थाको पक्षमा हुने आन्दोलनमा साथ दिन अनुरोध गरिएको छ ।

सुवेदी नेतृत्वको रहेको समितिले यसै महिनाको १५ गतेदेखि देशव्यापी आन्दोलन गर्दैछ।