विशेष अदालतमा कसरी हुँदैछ पूर्वप्रधानमन्त्री नेपालको बयान ?

११ असार, काठमाडौं । विशेष अदालतमा उपस्थित भएका पूर्वप्रधानमन्त्री माधवकुमार नेपालको बयान चलिरहेको छ । विशेष अदालतका सदस्यहरु तेजनारायण सिंह राई, रामबहादुर थापा र विदुर कोइरालाको इजलासमा बयान भइरहेको हो ।

बुधबार बिहान पूर्वप्रधानमन्त्री नेपालले दिएको निवेदनका आधारमा उनको मुद्दा इजलास नं.– २ मा तोकिएको थियो । इजलास बस्नासाथ तीन न्यायाधीशहरुको रोहबरमा अदालतका कर्मचारीहरुले नेपालको बयान लिइरहेका छन् ।

अदालतका कर्मचारीहरुले नेपाललाई सोध्नका लागि बिहानै प्रश्नावलीको तयारी गरेका थिए । कर्मचारीहरुले प्रश्न सोध्ने, त्यसमा आरोपितले जवाफ दिने अनि जवाफ सुनेर अदालतकै कर्मचारीले कम्प्युटरमा बयान टाइप गर्छन् ।

टाइप गरेको जवाफलाई त्यसलाई प्रिन्ट गरेर आरोपितलाई रुजु गराइन्छ र इजलासमा पेश हुन्छ । आरोपितहरुलाई आफैं जवाफ लेख्ने सुविधा पनि हुन्छ, तर पूर्वप्रधानमन्त्री नेपालले त्यो सुविधा नलिएको विशेष अदालतस्रोतले बतायो ।

यो पनि पढ्नुहोस

माधव नेपालबारे अख्तियारको निष्कर्ष : ‘कर्मचारीलाई दबाब दिएर पतञ्जलिलाई जग्गा दिलाए’

विशेष अदालतका कर्मचारीहरुले मुद्दामा लगाइएको आरोपका विषयमा केन्द्रित भएर बयान लिन्छन् । त्यसक्रममा आरोप लागेका व्यक्तिहरुले आफ्नो प्रतिरक्षा गर्न त पाउँछन् नै, आफ्नो धारणा बताउने अवसर पनि हुन्छ । मुद्दाका आरोपितहरुले अदालतमा दिएको बयानलाई महत्वपूर्ण प्रमाण मानिन्छ ।

पूर्वप्रधानमन्त्री नेपाल पक्षधर कानून व्यवसायीहरुका अनुसार, खाजा समयभन्दा अघि बयान सकिने अनुमान छ । त्यसो भयो भने खाजा समयपछि थुनछेक बहस शुरु हुन्छ ।

मुद्दाका आरोपितहरुलाई थुनामा पठाउने, उनीहरुसँग धरौटी माग्ने वा सामान्य तारिखमा छाड्ने विकल्पमध्ये कुन प्रक्रिया अपनाउने भनी तय गर्न थुनछेक बहस हुन्छ । त्यसपछि इजलासले तीन विकल्पमध्ये कुनै आदेश दिनेछन् ।

यो पनि पढ्नुहोस

नेपालमा कसरी पतञ्जलि आयो ? प्रधानमन्त्रीमाथि नै मुद्दा चल्नुको धरातल के हो ?

अख्तियारले २२ जेठमा पूर्वप्रधानमन्त्री नेपाल सहित ९३ जना विरुद्ध भ्रष्टाचारमुद्दा दायर गरेको थियो । उसले नेपालमाथि मन्त्रिपरिषदको निर्णयबाट हदबन्दी छुटको जग्गा सट्टापट्टाको स्विकृती दिएर भ्रष्टाचार गरेको आरोप लगाएको हो ।

पतञ्जली जग्गा प्रकरणका ९३ जना आरोपितमध्ये विशेष अदालतमा उपस्थित भएका नेपाल दोस्रो व्यक्ति हुन् । यसअघि विशेष अदालतमा उपस्थित भएका कानून उपसचि कलानिधी पौड्याल २५ हजार रुपैंया धरौटीमा छुटेका थिए ।

यो पनि पढ्नुहोस

माधव नेपालको राजनीतिमा सूर्यग्रहण

यो पनि पढ्नुहोस

माधव नेपालको बयान : पतञ्जलि निर्णयबारे मलाई केही याद छैन, बदनियत पनि होइन

यो पनि पढ्नुहोस

पतञ्जलि जग्गा प्रकरण : अख्तियारले सुटुक्क लियो माधव नेपालसँग बयान